На сите кошаркарски фанови, добро им е позната легендарната сезона 1995/1996, на шампионскиот Чикаго Булс. Предводени од најголемиот на сите времиња, Мајкл Џордан, “биковите” ги демолираа противниците доаѓајќи до својата 4-та титула во тимската историја.
Во ова ултра успешно првенство, Чикаго оствари (тогаш) рекордни 72 победи а забележа само 10 загубени мечеви. Еден од тие ретки порази дојде на денешен ден. На 10-ти Март 1996 година, “булси” гостуваа во “Медисон Сквер Гарден” каде ги пречека нивниот голем ривал, Њу Јорк Никс. Оваа вечер фаворитот беше непријатно изненаден од домаќините.
И покрај новата маестрална партија на “неговото кошаркарско височество”, тоа не беше доволно за продолжување на победничката серија. “Никси” им го нанесоа најтешкиот пораз на “биковите” таа сезона. Победија со импресивни 104-72 и го одбранија домашниот терен. Џордан постигна 32 поени кој на крајот се покажаа залудни за крајниот исход.
Балансираниот напад на њујорчани беше предводен од нивниот капитен Петрик Јуинг кој постигна 26 поени, а ветеранот Дерек Харпер реализира 23. Истата година, во плеј-офот, двата тима се соочија во полу-финалето на Истокот. Чикаго го елиминира Њу Јорк со конечни 4-1 во победи.
NBA FAN
Димитар Младеновски
