Дерик Џонс Јуниор е една од најспецифичните атлетски појави во Светот на спортот. Родум од Честер (Пенсилванија) во близина на Филаделфија, Џонс израснал како страстфен кошаркарски фан на “Сиксерси” во златните денови на (единствениот) Ален Ајверсон. Уште во средношколските денови го покажа својот неспорен потенцијал. Како играч на средното училиште Џон Керол, “авионот” (како што популарно го нарекуваат) предизвика медиска бура. Секојдневно на интернет сајтовите имаше нови видеа во кој буквално ја прелетува противничката одбрана.
Во 2015 година се пресели во Лас Вегас, каде се приклучи на еден од најпознатите кошаркарски програми на Западниот брег. Колеџот UNLV каде Џонс се задржа една година е ризница на кошаркарски таленти и ретко видени атлети. По успешната сезона се пријави на NBA драфтот 2016 година, и на изненадување на сите не беше избран.
На своја 19 годишна возраст за прв пат стапна на професионалната сцена откако потпиша т.н. незагарантиран договор со тимот на Феникс Санс. Се појави во 38 мечеви со скромна минутажа и на 7 Декември 2017, “сонцата” се откажаа од неговите услуги. Веќе следната сезона “Ди Џеј” се приклучи во уште една “жешка средина”. Од Аризона се префрли на Флорида. Од првиот момент кога стана член на Мајами Хит, стана миленик на навивачите. Без никаква дилема, претставува еден од најдобрите забивачи во NBA лигата.
Во Мајами, годинава Џонс ја играше својата трета полна сезона за тимот на “жешките”. Бележеше рапиден напредок во секој елемент на играта. Но, како негов заштитен знак, секако беа дотогаш незапаметено атрактивните забивања. На моменти просто, делуваше неверојатно колку “авионот” ја возбудуваше публиката со своите вертикални способности. Неговиот одраз (измерен на неверојатни) од 117 сантиметри е меѓу најдобрите 10 на сите времиња. Има само 23 години и неспорен потенцијал.Уживајте во најубавите моменти на “летачкиот” Џонс и неговото шоу над обрачите.
NBA FAN
Димитар Младеновски
