Попладнево, најактуелна е размената помеѓу три тимови. Чикаго, Кливленд и Портланд разменија крилини играчи.
Чикаго Булс, конечно, се ослободи од Лори Марканен. Незадоволниот фински репрезентативец, веќе подолго време, отворено даваше изјави во медиумите дека нема намера да остане во “ветровитиот” град. Биковите, најпосле најдоа начин да го разменат и да добијат нешто за возврат. По најлошата статистичка сезона во неговата четиригодишна професионална кариера, Марканен се сели во Кливленд.
Ситуацијата во новата средина е далеку од идеална. Тимот од Охајо се соочува со силна конкуренција при обидот да го задржи својот експлозивен бековски тандем, Колин Секстон и Дериус Гарленд. Во клубот остана еден од најголемите потенцијали на центарската позиција, Џарет Ален, кој потпиша астрономско висок договор вреден 100 милиони долари. Новиот крилен центар, Марканен, во наредните четири години ке заработи 67 милиони долари.
По сезона исполнета со повреди и многу незгоди, Лери Ненс се сели од Кливленд во Портланд. Тој претставува страшно атрактивен играч со одлични физички предиспозиции. Ненс (помладиот) претставува еден од најпотценетите играчи во NBA. Ова е негов трет тим. Кариерата ја започна во Лос Анџелес Лејкерс и по две и пол години беше разменет во Кливленд. Со оглед на тоа што исклучително расположеното поентерско дуо на “блејзерси” (Демиен Лилард и Си-Џеј МекКалум) го шират рекетот со својата неисрпна желба за шут, за очекување е дека токму тоа уште повеќе ќе го истакне идното присуство на Ненс во рекетот.
Чикаго има причини за радост. Освен што се ослободија од еден незадоволен играч, за возврат го добија едно од најатрактивните крила во лигата. Дерик Џоунс јуниор е поранешен шампион во забивање и еден од ретките кој секоја минута во игра ја користи на најдобар можен начин.
Биковите ова лето сериозно го засилија тимот. Ги доведоа Демар ДеРозан, Лонзо Бол, Алекс Карусо и јавно изразија интерес (по секоја цена) да го задржат својот најдобар играч, репрезентативецот Зек Лавин. Ланската сезона го ангажираа All Star центарот, Никола Вучевич, а со овој потег добија два избори на идните драфтови во првата и втората рунда. Реално гледано, сите тимови може да се чувствуваат победнички по денешниот меѓусебен “дил”.
NBA FAN
Димитар Младеновски
