Едно од најпријатните изненадувања во последните години е тимот на Феникс Санс. Лани тимот од Аризона за влакно не стигна до шампионскиот прстен. Дали “сонцата” повторно ќе блеснат годинава?
Прво име во тимот е еден од најдобрите поентери во NBA, Девин Букер. Во својата седма NBA сезона влегува по една одлична кампања во која просечно постигнуваше близу 26 поени по меч. Вистински лидер на тимот е ветеранот Крис Пол. Лани (по којзнае кој пат) докажа дека за него годините се само бројка. На своја 36 годишна возраст, го препороди тимот и го доведе до големото финале.
Поранешниот прв пик на драфтот, Диандре Ејтон, претставува еден од најсилните центри во лигата. Неговиот напредок е се повидлив, и од година во година (постепено) ги оправдува очекувањата. Од него се очекува дабл-дабл учинок на безмалку секој натпревар.
Новоангажираниот бек шутер, Чејсон Рендл, е поентерска машина во лимитирана минутажа која му беше доделувана во досегашната кариера. Сега со полни 28 години (и насобрано искуство) може да помогне влегувајќи од клупата за резерви со својата брзина и агилност.
Американскиот репрезентативец и трикратен шампион, Џавејл МекГи, претставува вистинско освежување на центарската позиција. Токму неговото пристигнување во Аризона беше вистинско изненадување за време на преодниот рок.
Во тимот остана двоецот бекови Микел Бриџис и Камерон Пејн по успешното ланско издание. Нови засилувања на бековската позиција се Елфрид Пејтон и Лендри Шемет, како и крилниот центар Чендлер Хачисон. Како најдобар дефанзивец во тимот се смета секогаш агресивниот Џеј Краудер, а на крилната позиција како негова “бек-ап варијанта” се ангажирани Френк Камински и дебитантот Џејлен Смит. Дарио Шарич и Камерон Џонсон лани имаа успешна сезона и од нив се очекува полн придонес.
Четата на тренерот Монти Вилијамс има многу причини оптимистички да го стартува новото првенство. По сјајниот поход предводени од својот плејмејкер лани, оваа година за тимот од “долината на сонцето” ќе биде исклучително тешко да го повторат минатогодишниот успех. Западот е многу силен, а “санси” се актуелни бранители на конференцијата. Следи интересна сезона.
NBA FAN
Димитар Младеновски
