Еден од најактивните тимови за време на преодниот рок беше тимот на Чикаго Булс. “Биковите” ангажираа нови адути со кој и тоа како сериозно пораснаа нивните апетити.
Најпрво го доведоа младиот и талентиран плејмејкер, Лонзо Бол кој пристигна од Њу Орлеанс. Во новата средина се очекува да добие сериозна минутажа и уште пред стартот на првенството на него се гледа како на играч кој може да има најголем напредок следната сезона. По ланскиот ангажман на All-Star центарот Никола Вучевич, Чикаго доведе уште една ѕвезда. Станува збор за четири кратниот All-Star и носител на олимписко злато, Демар Дерозан. Атрактивниот поентер, родум од Комптон, со себе носи 12 годишно професионално искуство. Со своите 32 години и играчка зрелост, исклучително возбудливо делува неговото спојување со првата ѕвезда на тимот, Зек Лавин.
Нови во тимот се и плејот Алекс Карузо кој доаѓа од Лос Анџелес Лејкерс како и едно од најатрактивните крила во лигата, летачкиот Дерик Џоунс јуниор. Ланскиот четврти пик на драфтот, Петрик Вилијамс како и младиот Коби Уајт се уште двајца играчи од кој сезонава се очекува многу. Сериозно прашање е длабочината на тимот. Клупата ја сочинуваат центарот Тони Бредли, силното крило Џавонте Грин, солидниот Тони Браун и ускличителниот талент кој доаѓа од Црна Гора, Марко Симонович.
Доколку коцките се вклопат како што очекуваат челниците од “ветровитиот град”, за очекување е “биковите” да имаат исклучително успешна сезона. Во случај да останат здрави и подготвени, Чикаго може да смета на висок пласман на се посилниот Исток. Зек Лавин и Демар Дерозан претставуваат исклучително силен бековски тандем. Доколку Никола Вучевич одигра стандардно солидна сезона, а остатокот од тимот даде полн придонес, “булси” сериозно може да се вбројат како еден од тимовите со најголем напредок следното првенство.
NBA FAN
Димитар Младеновски
