Во Источното конференциско финале, синоќа тимот на Бостон Селтикс обезбеди триумф (117:106) и на тој начин намали на 2:1 против тимот на Мајами Хит. Со овој триумф, Селтикси се вратија во игра, и сега можат да се фокусираат на четвртиот меч кој ке биде од исклучителна важност за остатокот од серијата.
Бостон доминираше во текот на целиот меч и не дозволи да отиде во непосакуван правец. Уште од самиот старт “келтите” го диктираа темпото. Константно имаа предност и водеа во целиот тек на натпреварот. Селтикси конечно заличија на сериозен состав кој успеа да се пласира во Источното финале. Во последните денови во медиумите излегоа информации за нетрпението и расправиите помеѓу играчите на Бостон. Се чини конечно проработе тимската хемија.
Со одлична тимска игра на почетокот на последната четвртина, тимот од Масачусец, поведе и со плус дваесет поени, што значеше и конечен триумф. Играчите на тренерот Бред Стивенс, ја зголемија креативноста, ја намалија себичноста и драстично беа подобри во одбраната. Еден од главните фактори за нивната зрела претстава е враќањето во тимот на Гордон Хејворд.
Кај “зелените” предводник беше бекот Џејлен Браун со 26 поени, го следеше младиот “All Star” Џејсон Тејтум со 25, а сјајниот плеј Кемба Вокер конечно, одигра на свое ниво постигнувајќи 21 поен со висок процент на реализација. Дефанзивно ориентираниот Маркус Смарт и неговите 20 поени беа вистинско освежување во нападот за најтрофејниот тим во историјата на лигата.
Во редовите на Мајами најефикасен беше центарот Бем Адебајо со 27 поени и 14 скокови. Дебитантот Тајлер Хироу уфрли 22, додека Џими Батлер застана на 17 кошеви. Следниот меч се игра во Среда наутро.
NBA FAN
Димитар Младеновски
