Еден од најголемите Европски играчи на сите времиња, легендарниот Тони Кукоч, деновиве излезе во јавноста со интересна изјава околу денешниот стил на игра во најдобрата кошаркарска лига во Светот. Хрватската икона, се осврна на начинот на кој се гледа на кошарката, како и драстично променетиот тактичко технички план во нападот на тимовите.
“Денес не е потребен плејмејкер. Порано, секогаш се бараше играч кој со леснотија би ја пренесол топката на противничката половина и би го организирал нападот. Во оваа ера, играчите имаат многу поголеми вештини. Мој став е дека сериозните тимови би згрешиле доколку трагаат по класичен плеј” – изјави популарниот “Куки”.
Тони Кукоч имаше блескава кариера во која освои се што можеше да се освои. Во NBA ја заслужи наградата за најдобар 6-ти играч на тимот (најдобра резерва) во сезоната 1995-1996. Токму таа сезона неговиот Чикаго успеа да постигне, до тогаш, невиден скор од 72 победи и само 10 порази. Иако ова достигнување беше надминато од страна на тимот на Голден Стејт Вориорс, разликата е во тоа што сезоната ’96 “биковите” ја освои титулата, што не им успеа на “воините” од Оукленд. За тоа каков играч (и личност) беше Кукоч, доволно говорат изјавите на неговите соиграчи и противници. Според мене, еден од најпотценетите играчи на 90-тите.
За тоа колку “Сплитскиот Пинк Пантер” беше пред своето време, доволно говори податокот дека со своите 208 цм. можеше слободно (и лесно) да одговори на четири позиции. Хрватскиот ас настапуваше како плеј па се до крилен центар, кога за тоа имаше потреба. Во зенитот на својата кариера беше единствениот играч во Светот, кој можеше да игра на плејмејкерската позиција со таа висина. Работата на теренот ја вршеше без никаква примедба, тивко и понизно под палка на најдобриот тренер во историјата – Фил Џексон. Кукоч е неизбришлив дел од 3-кратниот шампионски поход на Чикаго Булс во 1996, 1997 и 1998 година. Според кажувањата на кошаркарските аналитичари, во тоа време, Тони би бил прв играч или главна опција на 90% од останатите NBA тимови. 
За Kукоч прекрасно мислење има еден од најдобрите играчи на NBA денешницата, Кевин Дурент. Според негово мислење, Тони е еден од најквалитетните и најинтелегентни играчи кој се појавиле на кошаркарскиот терен. “Кеј Ди” исто така потенцираше дека токму Кукоч бил еден од неговите најомилени играчи во детството.
По завршувањето на неговата фантастична професионална кариера, која траеше речиси 20 години, Кукоч остана активен во кошаркарските кругови. Последните 5 години е “специјален надгледувач”, скаут, и предводник на младите играчи на тимот во кој ги постигна најголемите успеси. Кукоч е инструментален дел од управата на Чикаго Булс.
NBA FAN
Димитар Младеновски
