Приказната на Дариус Мајлс е една од најинтересните и истовремено најтрагичните.
Како еден од најголемите таленти во САД успеа да стигне до височините и експресно брзо да падне во бездна?
ПОЧЕТОЦИТE:
Уште од најрана возраст, Дариус Лавар Мајлс се одвојува од своите врсници. Во родниот Белвејл (Илиноис) многу брзо се слушна за младо момче од 206 цм. кој има стил на игра како плејмејкер. Неговиот неспорен талент и вртоглав потенцијал дојде на израз во средното училиште “East St.Louis” каде по фантастичните партии кој ги пружи во 2000-та година, беше добитник на наградата “Mr. Basketball” – најдобар средношколски играч на државно ниво.
Откако стана јасно дека има високи шанси да биде избран меѓу првите три “пика” на драфтот, Мајлс решава да го прескокне универзитетскиот баскет и од средношколските клупи директно да влета во професионални води. Кошаркарските аналитичари го споредуваа со големиот Кевин Гарнет.
На NBA драфтот 2000 година е избран како висок трети пик од страна на Лос Анџелес Клиперс.
Лос Анџелес Клиперс (2000-2002)
Од самото појавување во лигата, Мајлс приредуваше вистинско шоу. Во тоа време, младиот тим на “Клиперси” се обидуваа да испливаат од дното а со група млади и талентирани играчи (конечно) работите тргнаа во посакуваната насока. Лос Анџелес Клиперс (пред 2000-та година) имаше ужасен период кој се протегаше во три декади. Од 1977 година па се до 2000 година, “помалиот тим од Ел-Еј” успеа да обезбеди пласман во доигрувањето само 3 пати во 24 години.
Во тимот освен Мајлс беа и Ламар Одом, Квентин Ричардсон, Елтон Бренд и Кори Мегети а “Клиперси” веќе во првата година остварија 15 победи повеќе од претходната сезона. Сјајниот дебитант својата прва професионална година ја заврши со просечни 9.4 поени и избор во најдобрата дебитантска петорка на првенството.
Потпишува договор со Nike и станува амбасадор на “Jordan brand”, под раководство на Мајкл Џордан. Набрзо почнува да добива шанса и од филмските режисери во Калифорнија кои му дадоа одредени улоги на големото платно и се почесто се појавува на ТВ екраните.
Во втората сезона “Ди-Мајлс” продолжи да напредува а неговиот тим играше атрактивно и возбудливо. И покрај видливиот напредок на тимот, силната конкуренција на Западот го стори своето. Лос Анџелес Клиперс не успеа да се пласира во “плејофот” а челниците на тимот беа решени да превземат се што е потребно за тоа да се смени.
Одлуката падна со потрага по класичен плејмејкер кој ужасно им недостигаше. Го најдоа во Андре Милер (од Кливленд Кавалирс) кој претходното првенство беше најдобар асистент во NBA но, за неговото ангажирање мораше да се откажат од Дариус Мајлс кој замина за Охајо.
Кливленд Кавалирс (2002-2004)
За “коњаниците”, Мајлс настапи на 104 средби на кој освен атлетскиот потенцијал не покажа нешто посебно. Во тој период во тимот пристигна Леброн Џејмс а Мајлс беше еден од ретките кој очекуваше дека поентерските задачи нема (во целост) да му припаднат на еден од најдобрите играчи кој се појавиле на кошаркарските терени.
Видливо беше дека Мајлс е премногу млад и недоволно созреан за да прифати поозбилна улога во тимот. Навивачите и управата очекуваа повеќе од него, пред се поради возбудливоста со која настапуваше претходно, во “Клиперси”.
Честите конфронтации со челните луѓе во клубот поради неговата недисциплина, од ден на ден беа се поочигледни. Ова претставуваше и еден вид предупредување за проблемите кој ќе го следат во понатамошниот дел од неговата кариера.
На 21 Јануари 2004-та година преку трампа е испратен во Портланд.
Портланд Треил Блејзерс (2004-2008)
Ова беше период кога во тимот од Орегон се случуваа многу промени и сите тешко ја прифатија аклиматизацијата на новите услови. Од кандидат за титулата, “Блејзерси” станаа аутсајдери а тоа воопшто не му се допаѓаше на младото крило.
Во 4-те години во кој насапуваше за Портланд, Мајлс често се соочуваше со повреди а и конфронтации (со тренерот Морис Чикс како и со управата на тимот). Имаше богат договор а и напредок во својата игра но, здравствените проблеми како и самата неактивност на челните луѓе буквално го правеше гневен.
Незадоволноста на Мајлс најмногу ја приметуваше капитенот на тимот, Дејмон Стадемаер кој и покрај делењето на искусни совети не можеше да допре до него. Дариус пропушташе многу натпревари поради повреди а тоа го правеше се по незадоволен и демотивиран за игра.
На 24 годишна возраст конечно има знаци на подобрување. На 15 Април 2005, постигнува рекорд на кариерата од 47 поени на гостувањето во Денвер при тоа влегувајќи од клупата за резервни играчи. Постигнува по 14 поени по натпревар но, следува нов удар.
Мораше да се реши за хируршки зафат на левото коленото кое подолг период му предизвикуваше проблеми. Пропушта цели две сезони (2006-07 и 2007-08) и многумина веќе го отпишаа. Првите луѓе на тимот ова го пријавија во NBA како повреда која ќе претставува крај на неговата кариера се со цел, да се ослободат од него и неговиот богат договор.
Во Орегон владееше песимизам околу ефикасноста на рехабилитациониот процес. Порталнд го отпушта од составот и почнува процедура за да докаже дека остатокот од договорот на Мајлс, поради сериозноста на повредата и неговата неактивност, нема потреба да му биде исплатена.
Обид за враќање на теренот (2008 и 2009)
Мајлс беше решен (по секоја цена) да се врати на кошаркарската игра а и реално имаше огромна причина тоа да го стори.
Доколку изиграше најмалку 10 натпревари за било кој NBA тим, ќе го принудеше својот поранеше тим (Портланд) да му ги исплати преостанатите 18 милиони долари од договорот (сума која поради повредата “Блејзерси” немаа намера да му ја “подарат”).
По неуспешниот обид да избори место во ростерот на Бостон Селтикс, во Јануари 2008-ма година тимот на Мемфис Гризлис го ангажира во своите редови по речиси 30 месечна пауза од активно играње кошарка.
Таму настапува на 34 средби со мала минутажа и просечни 3.5 поени по натпревар. Го добива она за кое што се врати на теренот, финансискиот дел.
Во периодот во кој настапуваше во NBA, Дариус Мајлс заработи околу 65 милиони долари што е вртоглаво висока сума. По завршувањето на сезоната 2008-09, Maјлс е повторно во потрага по клуб. Шарлот Хорнетс му дава шанса но, пред самиот почеток на новото првенство управата се решавада се ослободи од него. Тука почнува неговиот катастрофален пад.
Депресија и проблеми со законот (2009-2017)
Во 2009-та година, Мајлс беше уапсен поради поседување на марихуана. Две години подоцна (во Август 2011 година) беше уапсен на аеродромот во Сент Луис, каде проба да се качи во авион со огнено оружјe и муниција во него! Мајлс се обиде да внесе наполнет пиштол преку обезбедувањето на аеродромот!!!
Младиот човек, очигледно, имаше некои проблеми. Парите не требаше да бидат едни од нив. Кога Мајлс речиси исчезна од насловите, повеќето претпоставуваа дека живее од тие 65 милиони долари што ги заработи за време на неговата играчка кариера.
Таа неверојатна сума на пари не успеа да ги надживее сеќавањата на Мајлс во неговиот врв.
Се почести беа гласините дека Мајлс има сериозни проблеми и дека пати од депресија, посебно по смртта на неговата мајка која во 2010 година починува од карцином. Цели седум години, ретко кој слушна што прави Дариус Мајлс и каде воопшто се наоѓа?
Во Септември 2016 година доаѓаат катастрофални вести за финансиската ситуација на некогашниот најголем кошаркарски талент во Америка. “Belleville News-Democrat” објави дека Мајлс поднел барање за стечај, нуспроизвод на неплатена издршка за деца, даночен долг, неуспешен договор за недвижнини и прекумерно трошење. Добивката од аукцијата ќе оди кај неговите доверители. Мајлс банкротира.
Банкрот и изолација (2018)
Во Февруари 2018-та година, конечно се случува аукција преку која Мајлс се надева дека (барем за кратко) ќе исплови од финансискиот бродолом. Медиумите до детал пренесоа информации за тој настан.
“Да можеше присуството да беше задолжително за секое талентирано дете кое некогаш ќе заработи пари од спортување. Каква лекција може да биде ова за оние кои се доволно надарени да влезат во професија каде парите доаѓаат толку брзо што изгледа дека никогаш нема да престанат, а потоа исчезнуваат побрзо отколку што пристигнале.
Задачата би била едноставна.”
“Облечете ги чевлите на Дариус Мајлс, со големина 52.
Гледајте потполно непознати луѓе како ги пробуваат вашите капи.
Видете како ги наддаваат вашите пиштоли со голема моќност, додека другите гласно се прашуваат зошто на кошаркарот му треба таква огнена моќ?
Слушнете како ја преиспитуваат автентичноста на дресовите и патиките со автограм.
Слушајте ги како се смеат на ваша сметка.”
Мајлс е тешко да се пронајде во овие денови.
Обидите да се контактира со него се претвораат во ќорсокак.
Ако требаше да се појави во јавноста сигурно немаше да биде на ова место, преполнето со неговите лични работи распослани низ експо центарот.
“Доколку видите жолта ознака со број еден на неа, тие потекнуваат од случајот за стечај на Дариус Мајлс“ – аукционерот Вирџил Стратер, им се обраќа на насобраните во 17:30 часот.
Поголемиот дел од вниманието беше насочено кон спортските сувенири на Мајлс, особено дресот со автограм на Леброн Џејмс кој чини 1.500 долари.
Но, тој жолт број 1 беше “малтерисан” насекаде!
Од “четирицикл” што изгледаше сосема нов, до трпезарија сè уште завиткана во пластика, до неверојатна опрема за караоке, преку маса наредена со повеќе од 10.000 DVD-а и видео игри. Дури имаше и “Ругер АР-556”, едно од четирите огнени оружја кој се најдоа на аукцијата.
Се проценува дека 80% од поранешните играчи во NBA е банкротирани две години по пензионирањето.
– “Belleville News-Democrat” (Февруари 2018)
Враќање во реалноста (2019-денес)
По ужасниот период кој траеше една декада, Мајлс конечно се враќа на правиот пат.
Неговиот голем пријател и поранешен соиграч, Квентин Ричардсон стапи во контакт со него и од 2019-та година наваму имаат своја “радио-емисија” наречена “Knuckleheads”, која е една од најпопуларните во САД.
Во Октомври 2021 година, Мајлс повторно се соочи со проблеми со законот. Беше обвинет дека е дел на комплексна мрежа во која поранешни NBA кошаркари (наводно) сакале да измамат осигурителни компании и здравствени установи. Случајот сеуште е во тек.
Се чини проблемите не може да го заобиколат “нашиот херој” но, едно е сигурно. Мајлс останува позитивен и насочен кон себеподобрување.
Оваа приказна е една од оние која на најубав начин ни го отсликуваа “патот кон ѕвездите” кој може да биде подеднакво волшебен и ужасен. Зависи од нас.
NBA FAN
Димитар Младеновски
