На дуелот помеѓу Мемфис Гризлис и Минесота Тимбервулвс бевме сведоци на нешто што ретко се гледа.
Младите “волци” фуриозно го започнаа натпреварот со 11:0 и пред својата публика направија огромна предност. Во еден момент беше +26 (47:21) но тогаш одговорот стигна од Дезмон Бејн кој постигна три тројки по ред и го врати тимот од Тенеси во живот. На почетокот на второто полувреме следи нова силна серија на Минесота, течна игра и атрактивни поени на Ентони Едвардс и Дианџело Расел. Пред почетокот на последниот период домаќините водат со +23 (81-58) и скоро сите се убедени во триумф.
Последната четвртина беше волшебна за младите “гризли мечки”. Џа Морент како вистински лидер го враќа својот тим во игра. Дезмонд Бејн и Тајс Џонс се непогрешливи од далечина и Мемфис ја добива последната делница со неверојатни 37-12. Тешкото положување на Морент и тројката на Дилон Брукс ја потврдуваат големата победа на гости (104:95).
Главни фигури во освојувањето на “Таргет” центарот беа Џа Морент кој оствари трипл-дабл учинок (16 поени + 10 асистенции + 10 скокови) и Дезмонд Бејн со 26 поени. Одлична претстава пружи и центарот Брендон Кларк кој од сенка реализира 20 поени. Мемфис води со 2:1 во победи.
NBA FAN
Димитар Младеновски
