Синоќешната NBA програма броеше четири неизвесни натпревари.
Чикаго гостуваше во Оклахома и победии со 111-110. Иако домаќините во последниот период се вратија во игра и го добија со +13, сепак поквалитетниот тим заслужено триумфираше. Прв стрелец за победникот беше црногорскиот интернационалец Никола Вучевич со 26 поени следен од дебитантот Ајо Досунму (кој одлично ја искористи добиената минутажа) со 24 поени и 8 асистенции. Зек Лавин се врати по паузата од 5 натпревари поради повреда, и реализираше 23 поени и 7 асистенции. Чикаго со скор од 29-17 е на втората позиција на Истокот, под Мајами кој има една победа повеќе од “биковите” (30-17).
Феникс Санс ја потврди првата позиција и ја порази Јута на свој терен (115-109). Тимот од Аризона стигна до својата седма победа по ред благодарејќи на одличната игра во последната четвртина, каде го скрши отпорот на противникот. Прв стрелец беше Девин Букер со 33 поени, следен од Крис Пол кој имаше фантастичен дабл-дабл учинок сочинет од 27 поени и 14 асистенции.
Кливленд Кавалирс го пречека Њу Јорк Никс во уште еден интересен и тесен натпревар. Конечни 95-93 за “кавси” за завземање на петата позиција на табелата во Истокот. Прв играч беше поранешниот All-Star, Кевин Лав кој влегувајќи од клупата за резерви потсети на своите најдобри денови, реализирајќи дабл-дабл со 20 поени и 11 асистенции.
За крај, Њу Орлеанс ја пречека Индијана и благодарение на својот бековски тандем успеа да го одбрани домашниот терен (117-113). Девонте Грем постигна 25 поени а Џош Харт 22 и беа најзаслужни за 18-та победа сезонава.
NBA FAN
Димитар Младеновски
