Рано утрово бевме сведоци на многу нови договори и информации кој ја раздрмаа кошаркарската сцена.
По информацијата дека Кевин Дурент бара да биде разменет во друг тим и нема намера да продолжи како играч на Бруклин Нетс, следуваа официјалните потписи на повеќе ѕвезди со своите актуелни тимови.
Актуелниот најкорисен играч во лигата, Никола Јокич го продолжи договорот со Денвер. Србинот за 5 годишна верност ќе добие неверојатни 264 милиони долари. Ова претставува најбогатиот договор кој било кој играч го добил во историјата на NBA. “Нагетси” како замена на центарската позиција догодина ќе го имаат Деандре Џордан кој потпиша едногодишен договор вреден близу 3 милиони долари.
Бекот шутер на Вашингтон Визардс, Бредли Бил се реши да остане во главниот град и во наредните 5 години ќе заработи 251 милион долари. Кај “волшебниците” пристигна и бекот Делон Уајт кој ќе треба да помогне од клупата за резерви. Оклахома Сити го “врза” агресивниот Лу Диорт и наредните пет години младиот борец ќе заработи близу 88 милиони долари.
Првата ѕвезда на Феникс Санс, Девин Букер за четиригодишна верност кон тимот од Аризона ќе инкасира 214 милиони долари. Договорите со актуелните тимови ги продолжија и Џа Морент (со Мемфис Гризлис) како и Карл Ентони-Таунс (со Минесота Тимбервулвс). Кај “волците” пристигна и крилото Кајл Андерсон кој за две години ќе заработи 18 милиони долари.
Еден од најперспективните млади плејмејкери во лигата, Енферни Сајмонс ќе остане во Портланд наредни четири години а за тоа ќе заработи 100 милиони долари. Лоса Анџелес Клиперс го задржа францускиот ветеран Николас Батум кој наредните две години ќе добие 22 милиони долари.
Њу Јорк Никс конечно потпиша со одличен играч. Џејлен Брансон пристигнува од Далас и за четиригодишна вредност ќе заработи 110 милиони долари. На тимот му се приклучи и центарот Ајзеа Хартенстин кој за две години ќе добие 16 милиои долари. Тимот од “големото јаболко” го реализира својот главен проект доведувајќи го Брансон во тимот каде настапуваше неговиот татко. Се очекуваат и нови конкретни потези на управата.
Центарот на Бруклин Нетс, Николас Клекстон го продолжи договорот за 10 милиони по сезона во наредните две години. “Мрежичките” го добија и бекот шутер Ројс О’Нил од Јута Џез а за возврат испратија иден пик од првата рунда на драфтот. Во тимот останува и Австралискиот бек, Пети Милс кој за двогодишна вредност ќе заработи 14.5 милиони долари.
Милвоки Бакс го задржа крилото Боби Портис кој за 4 години ќе заработи речиси 50 милиони долари како и шутерот Весли Метјус, а на тимот се приклучи и Австралискиот ветеран Џо Инглс кој потпиша едногодишен договор. Ривалот од централната дивизија, Чикаго Булс го доведе центарот Андре Драмонд а Орландо по долги преговори и безброј шпекулации успеа да ги задржи младите Мо Бамба и Гери Херис.
Филаделфија 76ерс успеа да го доведе еден од најдобрите дефанзивци во NBA, Пи-Џеј Такер кој за три години ќе добие 33 милиони долари. “Сиксери” потпиша и двогодишен договор со Дануел Хаус. Торонто Рептрос го задржа своето младо крило, Крис Бушер кој за три години ќе доби 35 милиони долари. Веднаш потоа следуваше и продолжување на договорот со ветеранот Тадиус Јанг кој за две години ќе добие 16 милиони долари.
Мајами Хит на големо задоволство на навивачите и следната сезона повторно ќе може да смета на Виктор Оладипо. “Жешките” го задржа и ветеранот Двејн Дедмон на уште две години за 9 милиони долари. Четата на Пет Рајли спрема големи потези кој во наредните денови планира да ги обелодени.
Лос Анџелес Лејкерс потпиша нови договори со центарите Демиен Џонс и Вејн Гебриел, а нови “езерџии” ќе бидат младото и перспективно крило Лони Вокер, овогодинашниот шампион Хуан Тоскано-Андерсон и Трој Браун јуниор. Тимот го напушта Малик Монк кој преминува во Сакраменто Кингс на двогодишен договор вреден близу 20 милиони долари.
Детроит Пистонс го задржа Кевин Нокс и поранешниот втор пик на драфтот, Марвин Бегли кој во наредните три години ќе добие 37 милиони долари. Далас Маверикс успеа да го врати центарот Џавејл МекГи во своите редови (каде настапуваше во сезоната 2015-2016). Трикратниот шампион потпиша тригодишен договор за околу 30 милиони долари.
NBA FAN
Димитар Младеновски
