Најинтересниот NBA меч синоќa се случи на Флорида.
Мајами Хит го пречека Бруклин Нетс во “Американ Ерлајнс” арена. Домаќините играат многу променливо во последниот месец. Нивниот лидер Џими Батлер, отворено ги критикуваше своите соиграчи околу ангажманот и борбата на теренот која очигледно недостига. Дополнителен проблем е што токму најдобриот играч на “жешките” не можеше да настапи на дуелот против големиот фаворит.
Во исклучително тесен натпревар на кој ниту еднаш еден од твата тима немаа повеќе од 7 поени предност, во последните секунди беше решен победникот. All-Star центарот на Мајами, Бем Адебајо, ги постигна решеавачките поени за конечни 109-107 и прекин на серијата од три порази по ред. Адебајо оствари дабл-дабл учинок сочинет од 21 поен и 15 скокови, следен од словенскиот “змеј” Горан Драгич со 18 и Кендрик Нан со 17 поени. Најновото засилување за Мајами, ветеранот Тревор Ариза, имаше силен придонес од клупата за резерви постигнувајќи (значајни) 15 поени. 
На спротивната страна, изненадувачки, прв стрелец беше “бек-ап” плејмејкерот Лендри Шемет со 30 постигнати поени, следен од Кајри Ирвинг со 20 поени и 9 асистенции. Сериозно загрижува податокот што Кевин Дурент ја напушти играта по само 4 минути поминати на паркетот поради претрпен удар во налет кон рекетот. Тимските доктори го окарактеризираа како истегнување на квадрицепсот. Во текот на денот се очекуваат вести околу сериозноста на повредата.
NBA FAN
Димитар Младеновски
