Во дуелот помеѓу конкурентите за врвот на Истокот, синоќа се судрија Бруклин Нетс и Филаделфија 76-ерс.
Во тензичен и неизвесен меч, гостите од Пенсилванија го освоија гостинскиот терен (110-102). Со овој триумф “сиксерси” се реваншираа за претходно претрпениот пораз во нивниот неодамнешен дуел. Прв играч за Филаделфија беше Џоел Ембид кој постигна 34 поени, следен од Тајрис Макси со 25. За домаќините Кевин Дурент и Џејмс Харден постигнаа по 33 поени, кој не беа доволни за победа. Харден покрај 33-те постигнати поени, имаше и 14 скокови и 10 асистенции, остварувајќи трипл-дабл учинок.
Веднаш по завршувањето на мечот, дојде до вербален судир помеѓу Џоел Ембид и Кевин Дурент. Ембид не заборави на провокацијата од Дурент на нивниот претходен дуел, и му порача на сјајниот стрелец “да си оди дома”. За среќа не се случи ништо по сериозно, а веднаш по расправијата, Дурент даде изјава:
“Доколку сте ме гледале мене и Џоел, кога играме (еден против друг) енергијата е на највисоко ниво. И покрај се, ние се почитуваме а се останато е дел од борбата и желбата за победа” – изјави “Кеј-Ди”.
“Сиксерси” имаат три победи по ред и во моментов се наоѓаат на шестото место во Истокот. Бруклин и покрај поразот е сеуште првопласиран.
NBA FAN
Димитар Младеновски
