Втор ден по ред, NBA лигата е во центарот на вниманието.
Јута Џез и Минесота Тимберволвус направија трампа. Трикратниот најдобар дефанзивец, Руди Гоберт пристигнува во Минеаполис а на спротивната страна пристигнува пакет составен од Петрик Беверли, Малик Бизли, Џаред Ванербилт, Вокер Кеслер и 4 избори на наредните драфтови. Детална анализа следи во наредните денови.
Кливленд Кавалирс потпиша едногодишен договор со искусниот центар Робин Лопез кој ќе заработи три милиони долари за следната сезона. Во тимот се враќа и плејмејкерот Рики Рубио со нов тригодишен договор вреден близу 19 милиони долари.
Кевон Луни го продолжи договорот со шампионот Голден Стејт Вориорс. Младиот центар за тригодишна верност ќе добие 25.5 милиони долари. Ветеранот Ото Портер јуниор заминува во Торонто кој беше решен да го доведе по секоја цена поради неговото искуство. Тимот го напушта и Гери Пејтон II кој следното првенство ќе настапува во Портланд, дополнително појачувајќи го веќе засилениот состав на “блејзерси” кој само пред нецела недела го доведоа репрезентативецот Џереми Грент.
Индијана Пејсерс го испрати Малком Брогдон во Бостон а за возврат го доби центарот Даниел Тајс, Ерон Нејсмит и иден избор од првата рунда на драфтот. Нова трампа на Атланта која го испрати шутерот Кевин Хуртер во Сакраменто во замена за бекот Џастин Холидеј, крилото Мо Харклес и иден избор од првата рунда.
Чикаго Булс (како што претходно најави) го задржа својот All-Star, Зек Лавин со нов петгодишен договор вреден преку 215 милиони долари. Во “ветровитиот град” останува и еден од нај атрактивните играчи во лигата, Дерик Џонс јуниор кој за две години ќе добие 6.6 милиони долари.
Двајца центри останаа во своите досегашни тимови. Најпрво, боцанецот Јусуф Нуркич го продолжи договорот со Портланд Треил Блејзерс и за четиригодишна верност ќе добие 70 милиони долари. И Њу Јорк го задржа својот центар. Мичел Робинсон во наредните четири години добива 60 милиони долари.
