НАСА објавила неверојатни фотографии кои покажуваат дека во централна Африка некогаш постоело езеро поголемо од Каспиското.
Мега Чад, како што го нарекле, се простирало на 390.000 квадратни километри ширум Сахара и ако постои денес, би било најголемо на светот.
Денешното езеро Чад е само делче од тоа што некогаш тука постоело.
На снимките се нагласени потемни, пониски делови од тоа подрачје, заедно со наслагите од песок кои се формирале околу брегот на Мега Чад.
Експертите сметаат дека на езерото му биле потребни неколку стотици години да се собере на денешните 1.350 километри квадратни.
“Периодот на влажност во Северна Африка завршил пред околу 5.000 години”, истакнуваат научниците.
Инаку, на јужниот дел од пустината Сахара се наоѓа најниската точка во Чад, околу 155 метри под нивото на морето, наречена Боделе.
Се верува дека тој басен бил се исушил пред околу 1.000 години. Плодната прашина од басенот одела преку Атлантикот и така се “обогатиле” амазонските прашуми.
Басенот Боделе бил богат со хранливи состојки кои можеле да бидат причина за толку бујната природа во Амазонија.
“Амазонската тропска прашума е како огромна корпа. Во таква средина, големата дневна количина на вода брзо ги перат нутриентите од земјиштето, така што тие мора да бидат заменети. Тоа значи дека нутриентите можеле да дојдат само од надворешен извор”, рекол доктор Сајмон Армитаџ, објаснувајќи ги врските меѓу Сахара и Амазон. Звучи неверојатно, но сахарскиот песок е главното ѓубриво на бујната амазонска природа.
Тимот од истражувачи исто така се обидел да ја утврди староста на брегот на Мега Чад, претпоставувајќи дека датира од пред 15.000 години.
