Нејмар повторно во Барселона? Невозможна мисија, тврди првиот човек на каталонскиот гигант Жозеп Мариа Бартомеу.
Првиот човек на Барса во разговор за „Радио Канал Барселона“ призна дека неколку пати се слушнал и видел со Нејмар во последните година и пол дена откако Бразилецот замина во ПСЖ. Тоа било доволно за да се лансираат гласини, кои уредно се подгреваат како што се наближува преодниот рок, дека првата ѕвезда на „Светците“ би можела да се врати на „Камп Ноу“.
Сепак, Бартомеу тврди дека тој трансфер е невозможна мисија и дека никогаш до сега ниту Нејмар, ниту било кој од неговото опкружување, не ни споменал можност за враќање.
„Зборував со Нејмар неколку пати за овие година и пол дена. Еднаш се видовме, но никогаш никој од неговото опкружување не ми рекол дека сака да се врати. Ниту Нејмар некогаш побарал некој од челнциите на клубот да зборува на таа тема. Тој има договор со ПСЖ, ова му е втора сезона во клубот и тешко дека ќе прифатат да го продадат на лето“, тврди Бартомеу.
Претседателот на Барселона додаде дека неговиот клуб не ни може да го врати Нејмар поради клаузулата.
„Ние сме во хендикеп во однос на останатите клубови поради клаузулата. Тука сме немоќни. Поради тоа е невозможно Нејмар да се врати во Барселона“, тврди Бартомеу.
Каталонците пред годин и пол го продадоа Бразилецот во ПСЖ за сума од 222.000.000 евра. Тие пари се искористени за доведување на Кутињо и Дембеле, од кои се очекуваше да го заменат Нејмар, меѓутоа, учинокот е под очекувањата, пред се од Кутињо, за кого се смета дека би можел на лето да ја напушти Барселона.
Бартомеу, сепак, тврди дека челниците имаат целосна доверба во двајцата.
„По заминувањето на Нејмар, клубот избра нов пат, со Дембеле и Кутињо. Тоа е облог на кој бевме приморани. Тие двајца се најголемите инвестиции во историјата на Барселона и веруваме во нив 100 проценти“, порача Бартомеу.
