Австриските медиуми откриваат дека девојката која го намести вицеканцеларот Штрахе не е Русинка, туку потекнува од Босна и Херцеговина и добро заработила од сработеното.
На 17-ти мај австриските медиуми објавија видео снимка која ја сруши австриската влада, а политичката криза кулминираше со изгласана недоверба на Себастијан Курц. На видеото можеа да се видат лидерот на Слободарската партија, коалициски партнер на Курц и вицеканцелар на Австрија – Ханс Кристијан Штрахе и неговиот соработник Јохан Гуденус.
Тие разговараа за финансирање на нивната десничарска партија, за донации и за можното влијание врз австрискиот медиум „Кроне Цајтунг“ од страна на девојка која им се претставила дека е внука на руски олигарх.
Девојката се претставила како Русинка, внука на познат руски олигарх кој сака да вложи 250 милиони евра во австриската економија. Таа иако вели дека станува збор за нелегални пари, тоа очигледно не им пречи на Штрахе и Гуденус кои ѝ нудат да го превземе австрискиот медиум, да ја поддржи нивната партија, а во замена да добие мултимилионски тендери.
Синоќа, токму „Кроне Цајтунг“ објави нов пресврт на големата афера која ја потресе Австрија. Имено, весникот открива дека Русинката од видеото е всушност девојка со босанско потекло која зборувала повеќе странски јазици.
Се тврди дека станува збор за студентка по агрономија која за „улогата“ во филмот била платена од 6 до 7 илјади евра по ден.
Инаку, Хајнц Кристијан Штрахе во меѓувреме поднел тужба против виенски адвокат, детектив и женско лице кои го намамиле во видеото кое резултираше со негова оставка и пад на владата на канцеларот Себастијан Курц.
