Фејсбук статусот со говор на омраза на припадничката на АРМ која напиша дека напаѓачот од Нов Зеланд треба да добие Нобелова награда, наиде на остри критики од јавноста.
Лазаровска, ангажирана како професионален војник во артилериската единица, поради тој предлог, како што е оценето, на социјалните мрежи шири омраза. Во делот на осуда во медиумите, конкретно се бара нејзина суспензија поради статусот дека терористот од Нов Зеланд, одговорен за масакрот во две џамии каде беа убиени 50 луѓе, заслужува Нобелова награда.
Од дисциплинската комисија од Генералштабот потврдуваат дека веќе се води дисциплинска постапка и побарана е најстрога санкција, а дотогаш не смее да користи оружје.
„По сознанието од наша страна, согласно законските регулативи и надлежности почната е постапка за утврдување на одговорност и за преземање соодветни дисциплински мерки. Генералштабот најостро го осудува секој облик на изразување на каков било вид на нетрпеливост, дискриминирачко однесување или поддршка на истите од кого било. Од Генералштабот е наложено до потчинетите команди и единици секогаш да се преземат соодветни мерки за спречување и најостро санкционирање во рамки на законските надлежности на било кој непримерен облик на однесување и нарушување на угледот на Армијата од страна на своите припадници“, велат од АРМ.
За Уранија Пировска, првиот човек на Хелсиншки комитет, феноменот на говор на омраза може да се спречи само доколку има строги казни за оние кои го поттикнуваат.
“Несоодветното третирање на говорот на омраза дополнително предизвикува и насилство”, вели Пировска и верува дека случајот со припадничката на АРМ ќе стигне и до Јавното обвинителство.
Канал 5 се обиде да стапи во контакт со девојката за да ги открие мотивите зад напишаното, меѓутоа обидот бил неуспешен бидејќи Лазаровска ги деактивирала сите профили на социјалните мрежи.
