Директорот на Разузнавачката служба на Норвешка, генерал потполковник Мортен Хаг Лунде тврди дека руските воени сили наводно вежбале напад на норвешки арктички радар.
Според зборовите на Лунде, во симулацијата на напад која наводно се случила на 14-ти февруари 2018-та година, учествувале 11 бомбардери од типот „Су-24“.
Генералот открива дека руските авиони полетале од аеродромот Мончегорск во Мурманската област, го прелетале Баренцовото море, а потоа свртеле за 180 степени, симулирајќи напад во правец на Варде кој е најсеверен норвешки град.
Лунде открива дека таков напад бил организиран и во 2017-та година, но за време на симулацијата учествувале помалку авиони на руското воено воздухопловство.
Во Варде, област во близина на руската граница, поставен е американскиот радар „Глобус 2“ со кој што официјално управува Разузнавачката служба на Норвешка.
Според податоците на експертите, тој радар може да се користи за следење на лансирањата на руските интерконтинентални балистички ракети и да ги следи активностите на руската Северна флота. Според некои извори, овој моќен радар може да ги следи дури и објектите во вселената.
Русите во повеќе наврати изразуваа загриженост поради позицијата на радарот во близина на самата граница.
