Италијанските медиуми денеска објавија дека Фиорентина веќе подготвила 15 милиони евра за да му понуди на турски Фенербахче за услугите на младиот фудбалер, кој посебно импресионираше во последните десетина дена со настапите за македонската фудбалска репрезентација, постигнувајќи два гола во триумфот над Летонија во Скопје со 3-1, а одигра одличен и тактички зрел меч со Словенија во Љубљана.
Тимот од „Артемио Франки“ е последниот што се вклучува во трката, а втор од Апенините, откако од зимава Лацио сериозно му фрли око на Елмас, па се очекува во следниот период да се разгори битката за потписот на 19-годишнот македонски репрезентативец.
Елмас во Фенербахче замина од скопски Работнички во летото 2017 година и тоа за тренинг-компензација, а сега турските медиуми најавуваат дека Фенербахче ќе се обиде добро да заработи од него до 25 милиони евра.
