“Добра ноќ. Малезијан 370”, биле последните зборови на капетанот на летот MH370 кој исчезна на 8-ми март 2014 година. Авионот полетал од Куала Лумпур кон Пекинг и исчезнал од радарот по само 38 минути од полетувањето. Кога го пронашол воениот радар, MH370 скршнал од правецот и повторно исчезнал речиси 400 километри оддалечен од островот Пенанг во северозападна Малезија.
Во авионот имало 227 патници и 12 членови на екипажот. Најмладиот патник имал само 2 години. Исчезнувањето на Боинг 777 на Малезија Ерлајнс се смета за една од најголемите мистерии во историјата на воздухопловните несреќи. Пет години од неговото исчезнување на радарот, се уште се нижат бројни теории за тоа што точно се случило.
Новата теорија ја изнел Вилијам Лангевише, експерт за авијација, во магазинот “The Atlantic”, пренесува “Daily Mail”. Тој тврди дека капетанот на авионот Захарија Ахмад Шах го убил или онеспособил својот копилот и скршнал од правецот откако прешол во воздушниот простор на Виетнам. Потоа ја декомпресирал кабината за да ги успие и најпосле убие своите патници.
Инженерот Мајк Екснер се сложува со ваквата теорија и тврди дека пилотот го зголемил нивото на летот за декомпресирањето да се одвива што побрзо.
“Во кабината сето тоа би било незабележливо освен што би испаднале маските со кислород”, вели Лангевише. Тоа значи дека луѓето во кабината би биле онеспособени и во несвест за неколку минути, а потоа “нежно би умреле”. Откако ги убил, експертот тврди дека капетанот потоа го декомпресирал и кокпитот или намерно се спуштил во океанот.
Пријател на пилотот за “The Atlantic” изјавил дека делови од таа теорија се можни. Тој истакнал дека Шах лесно би можел да го измами копилотот со тоа што би му кажал да оди да провери нешто. Кога копилотот би излегол од неговата кабина, тој би почнал да го спроведува планот на дело. Пријателот потврдил и дека Шах имал проблеми во бракот затоа што ја изневерувал својата сопруга со бројни стјуардеси и таа знаела за тоа.
Бројни експерти сепак не се сложуваат со теоријата на Вилијам и тврдат дека декомпресирањето на кабината не е баш едноставно ниту изводливо на начинот на кој што тој го опишал во својот напис. Исто така тврдат дека пилотот бил страстен авијатичар и дека не би одвел 241 патник во смрт само поради брачни проблеми.
Сепак, ова е само една од бројните теории за тоа што се случило на летот MH370. Делови од авионот се пронајдени низ годините на разни локации во Мозамбик, Јужна Африка, на островот Рејунион и на Маврициус, и тоа воглавно на бреговите каде морето ги исфрлило.
Но, клучните докази односно црната кутија сè уште не е пронајдена, а без неа можеби никогаш нема да се дознае што навистина се случило.
