Константинос Зервас, новиот градоначалник на Солун смета дека Договорот од Преспа е лош и признава дека му е тешко да каже Северна Македонија кога зборува за нашата земја.
Градоначалникот на Солун за „Катимерини“ изјави дека нашата држава ја нарекува Скопје или ФИРОМ, спротивно од Договорот од Преспа кој беше потпишан од владите на двете земји во текот на минатата година.
Според градоначалникот на Солун, Договорот од Преспа е лош договор.
„Градоначалникот на Солун не е ниту министер за надворешни работи, ниту министер за туризам, ниту верувам толку многу во дипломатијата на градовите. Јас, исто така, сум малку почувствителен во патриотските и националните прашања. Сметам дека требаше да ги чуеме историјата и чувството на градот за некои прашања што се однесуваат на нашите односи со нашите северни соседи. Сметам дека Договорот од Преспа беше лош договор“, изјави Зервас за грчки „Катимерини“.
Зервас не даде конкретен одговор, односно изјави дека „тоа ќе го остави за во иднина“ откако беше запрашан дали би ја посетил Македонија доколку биде поканет од македонскиот премиер Зоран Заев.
Кога станува збор за спроведувањето на Договорот од Преспа, новиот градоначалник на Солун порача дека ќе прави сѐ што е во негова можност за тоа што ќе се појавува во светот како „македонско“ да се поврзува со Грција.
„Јас имам изјавено дека како општина Солун ќе работиме за било што се појавува како македонско во светот да се однесува на Грција, а не на републиката на Скопје“, изјави Зервас и порача дека не му е лесно да го користи името Северна Македонија.
