Новиот руски против-воздушен ракетен систем „С-500 Прометеј“ ќе може да пресретнува балистички ракети и да уништи аеродинамични цели како и крстосувачки ракети, тврди главниот уредник на магазинот „Извоз на оружје“, Андреј Фролов.
Фролов за весникот „Известија“ прецизира дека „С-500 Прометеј“ ќе биде наменет дури и за уништување на сателити, иако карактеристиките на најновиот против-воздушен систем на руската армија и натаму се чуваат во најстрога тајност.
„С-500 мора да биде елемент на комплексен систем со неколку ешалони. Ако некој сака да го купи „Прометеј“, тој во својот систем веќе ќе треба да ги има и системите С-400, С-300, Бук, Тор, Панцир-С и други“, објаснува Фролов.
Инаку, новиот „С-500 Прометеј“ спаѓа во најновата генерација на ракетни системи „земја-воздух“. Станува збор за универзален систем со голем домет и можност за пресретнување на мети на големи висини.
Системот кој се уште е во фаза на развој, би можел да биде доста интересен за повеќе земји, вклучувајќи ги Кина, Саудиска Арабија, Обединетите Арапски Емирати, Катар, Алжир и Иран, тврди Фролов.
„С-500 Прометеј“ ќе може да открие и истовремено да погоди 10 балистички надзвучни цели кои летаат со брзина од седум километри во секунда, како и боеви глави на најмодерните хиперсонични ракети.
Карактеристиките на најновиот против-воздушен ракетен систем, сосема очекувано, ќе бидат драстично подобрени во однос на актуелниот најмоќен „С-400“ систем, како и од американскиот еквивалент “Patriot Advanced Capability 3”.
