Популарниот актер Раде Шербеџија открил дека во Белград се вакцинирал против коронавирусот.
„Тоа го направив во Белград затоа што не се во ЕУ, па можат преку свои канали да набават разни вакцини за коронавирусот, што тоа и го направија досега. Сето тоа одлично го направија, така што многу луѓе од други земји токму таму се вакцинираа. Јас одлично го поднесов тоа. Многу мои пријатели од Сараево исто така отидоа таму да се вакцинираат. Тоа треба да се направи, не може да се чека. Кој може да го направи тоа, треба да го направи. Се надевам дека отсега вакцините побрзо ќе се дистрибуираат од ЕУ. Се надевам дека ова лето ќе може да го дочекаме помирни и дека ќе може да се дружиме. Имам такво чувство“, изјавил Шербеџија. Тој во последно време најчесто престојува во Истра:
„Луѓето се борат, размислуваат што и како од своите животи да направат, и приватно и професионално. Ова е тешко, доколку прашувате за нашата професија, ова сега е најтешкото доба. Затоа што ние – театарот и филмот, сме уметности кои што зависат од дружењата“.
Раде потоа споделил свој совет како луѓето понатаму да се справат со оваа ситуација:
„На некој начин треба да бидете паметни. Да бидете внимателни, секако, но треба на некој начин да се биде и паметен и да се обидете понатаму да продолжите во рамките колку што може и колку што ситуацијата дозволува да се продолжи со нешто, инаку сè ќе оди по ѓаволите. Луѓето ќе добијат последици на психата, ќе се раѓаат нови болести…“, искрено прокоментирал актерот.
