Белградската гордост совлада уште еден поранешен Европски шампион.
Кошаркарите на Партизан стигнаа до својата четврта Евролигашка победа. Во преполната “Штарк арена”, црно-белите го совладаа Макаби Тел Авив со 96:88 во осмото коло и стигнаа до 50% биланс. Поразот на гостите од Израел, ги доведе до идентични 4-4.
Ова беше прв натпревар помеѓу двата поранешни Европски шампиони по 2014-та година. Првото полувреме помина со предност на гостите кој го диктираа темпото. Одличниот шут за три поени (од над 60%) ги загрижи домашните навивачи. На почетокот од второто полувреме, повратникот во тимот, Ален Смаилагич постигна девет поени по ред и го започна “кам-бекот” на домаќините. Нивото на интензитет значително се подигна, а соиграчите Данте Егзум, Зек Лидеј и Матијас Лесорт ги воодушевија присутните.
Австралискиот интернационалец, Данте Егзум и Америчкото крило Зек Лидеј беа први стрелци во тимот со по 21 постигнат поен, а одлична игра пружија Матијас Лесорт со 16 и Кевин Пантер со 13 поени. Избраниците на легендарниот Жељко Обрадович уште еднаш докажаа дека се вистинска гордост на нашиот северен сосед.
Димитар Младеновски
