Шпанските власти ги протерале мигрантите од енклавата Сеута откако неколку илјади допливале од Мароко.
Премиерот Педро Санчез рекол дека од вкупно 8.000, кои во текот на претходните два дена влегле во Сеута, повеќе од 4.8000 биле вратени, а силите за безбедност на двете страни интервенирале за да се спречи понатамошно преминување, пренесува “Reuters”.
“Моментално вршиме примопредавање на оние кои влегле нерегуларно”, рекол Санчез пред парламентот.
Од утрово шпански војници и полицајци во борбена опрема следеле некои мигранти директно до Мароко, додека мароканската полиција растерала стотина момчиња од граничната ограда.
Лидерот на шпанската енклава претходно ги обвинил мароканските власти поради лошата безбедност и чувањето на границите и тоа го поврзал со одлуката на Мадрид да го прати бунтовничкиот лидер од Западна Сахара, територија под контрола на Мароко, во шпанска болница на лекување.
Шпанската министерка за надворешни работи, Аранча Гонзалес Лаија изјавила утрово дека Шпанија секогаш била разумна во врска со Западна Сахара.
Рабат го повикал својот амбасадор во Мадрид на консултации, рекол неименуван дипломатски извор, додавајќи дека во односите со Шпанија бил потребен момент на “контемплација”.
Шпанија претходно распоредила воени трупи и пратила дополнителни полициски сили во Сеута да патролираат на границата со Мароко откако околу 8.000 мигранти, вклучувајќи и 1.500 малолетници, во понеделникот и вторникот влегле во енклавата.
Министерот за внатрешни работа Фернандо Гранде-Марласка рекол дека Шпанија упатила 200 полицајци во Сеута на границата со Мароко.
Оклопни возила ја чувале плажата во Сеута во вторникот, а војниците и полицијата ги отстранувале мигранатите од плажите и фрлале димни бомби за да ги одвратат другите од преминување.
