Врската меѓу криминалните групи во Африка и Италија со нарко картелите на Балканот и Источна Европа создаде опасна мрежа која се шири низ целиот свет, па сè до Јужна Америка, каде е стационирана „Балканската мафија“. Се верува дека на стариот континент тие „обележале рута“ за транспорт на дрога и оружје и дека го прошириле бизнисот кон Блискиот исток, Африка, САД, користејќи ги морињата и океаните како безбедна рута. Ова е заклучокот на група италијански карабинери и Универзитетот во Милано.
Во својот извештај за трговија со дрога од 2017 година, Обединетите нации истакнаа дека балканската мафија управува со дури 40 отсто од пазарот на планетата. Оваа година, извештајот беше променет во само една реченица, додавајќи дека Еквадор сега е нивниот главен извор на снабдување и ново место за криење.
Во овој извештај, Еквадор се споменува како „транзитна зона“, од каде што наркотиците одат на Балканот, но и во Јужна Америка, каде што балканската мафија има сигурен и голем пазар.
Она што, според експертите, им помага на припадниците на оваа криминална организација е фактот дека тие се родени на европскиот континент и дека вратите на многу земји се „отворени“ за нив. На Балканците не им треба виза за да влезат во Еквадор, ниту пак некој да ги провери.
Цезар Пења Моран, обвинител во Еквадор, беше надлежен за спроведување истрага за балканската мафија. Истрагата имала звучно име – Операција Балкан. Тој за локалните медиуми изјавува дека Балканците се тивки и незабележителни, освен кога имаат проблем едни со други, затоа што секој конфликт завршува со убиство.
Точно тоа се случи на 21 јули во трговскиот центар Плаза Навона во Самборондон во провинцијата Гуајас, кога пред неговата ќерка и сопруга, беше убиена Саша Спасиќ (56), кој беше поврзан со трговијата со дрога.
Според официјалните обвинувања на еквадорската полиција, во домот на убиениот Спасиќ биле пронајдени голема сума пари, како и документи кои го поврзуваат со трговијата со дрога.
Цезар Пења тврди дека криминалци од нашиот регион „трчаат низ многу земји“.
Тие влегуваат во земјата под радарот и се кријат. Многу често дури и не излегуваат од своите скривалишта во текот на денот. Сите нивни активности се сведени на посета на пристаништа и присуство на состаноци. Кога ќе се договорат работата, тие се враќаат во матичната земја – тврди Пења.
Пења понатаму објаснува дека членовите на балканската мафија често ја применуваат стратегијата на искусни боксери. Тие влегуваат во рингот (град) каде што треба да ја извршат операцијата, да извршат силен удар и потоа да се повлечат.
Тие влегуваат во Еквадор како туристи или наводни бизнисмени, за да не привлечат внимание и случајно да им биде забранет влезот.
Затоа повеќето од нив доаѓаат во Еквадор со своите семејства, сопруги, деца, понекогаш дури и со нивните родители – тврди поранешниот обвинител.
Пења објаснува дека Балканците, откако го испитаат теренот, бараат начин како да опстанат. Многумина отвораат мали бизниси и се вклучуваат во некои економски активности за да обезбедат дозвола за престој.
Тие најмногу го прават тоа за да се прикријат, односно да ги оправдаат „заработените“ пари – вели Пења.
Во мај 2019 година двајца мажи кои пристигнаа во Еквадор од Египет и отворија берберница набргу завршија мртви. Тие биле застрелани во нивните домови.
Требаше да биде чист бизнис, а фирмата мала и незабележителна. Дури откако беа убиени, сфативме дека вртат милиони и милиони долари преку неколку сметки – објаснува Пења.
Тој вели дека во последните години, поточно во последните шест, тој најмногу работел со „фирми“ зад кои стојат Срби, Црногорци, Албанци и Косовари. Во решавањето на ваквите случаи, еквадорската полиција и обвинителите имаат сериозен проблем, а тоа е јазикот.
Оние кои се осомничени за кривично дело или членови на нивните семејства не зборуваат шпански, или барем се преправаат добро за да им веруваме. Имаат и деца, кои се на возраст од седум години и тие наводно не знаат да кажат ништо на шпански јазик. Тоа е веќе сомнително – истакнува Пења.
За да се решат ваквите ситуации и полесно да се разјасни случајот, службениците ја вклучуваат полицијата од сите земји на светот, како и Интерпол.
Имаме одлична координација со колегите од регионот и од Европа. Од нив секогаш добивавме одговор, но исто така им помагавме. Тие ја сметаат нашата земја како главно пристаниште, транзитна земја, од каде што дрогата патува во светот – објаснува полицискиот службеник генерал Арус.
Пена и Арус изјавуваат дека припадниците на балканската мафија оствариле одлични врски со „колегите“ во Сицилија, како и во некои јужни делови на Италија. Тие врски, посочуваат, се појавиле не само заради дрогата, туку и затоа што „браќата се препознаваат со насилство“.
Еквадорските медиуми посочуваат дека првите нарко-банди на Балканот потекнувале од воени или паравоени формации кои учествувале во војните во Југославија. Поради ова, Одделот за организиран криминал во Милано ја карактеризира Балканската мафија како „наследство на граѓанската војна“ во поранешна Југославија.
Додаваат дека Еквадор не е единственото место каде што балканските гангстери најдоа прибежиште. Тие посочуваат, како што одамна е познато, дека балканската мафија одлично делува низ Јужна Америка и дека многу членови имаат инфилтрирано во локалните картели.
Тие посочуваат дека ликвидациите секогаш се случуваат кога некој „ќе зачекори на нечија територија“.
Ги расчистуваат сметките, одмаздата е секогаш тешка и на крајот секогаш се убиваат едни со други – заклучува Арус.
Да потсетиме дека во последните десет години, ликвидирани се најмалку десетина Срби, Црногорци и Албанци во Јужна Америка. Тие беа убиени среде бел ден, додека седеа со сопругата и децата во ресторан или беа киднапирани и мачени. Зад скоро сите убиства е ист мотив – нерасчистени сметки за трговија со дрога од Јужна Америка до Европа.
