Претседателот на САД, Доналд Трамп синоќа го прими унгарскиот премиер Виктор Орбан во Белата куќа во Вашингтон.
Како што пренесува новинската агенција „АП“, ова е уште еден пример во кој американскиот претседател покажува дека нема проблем да оствари средба со лидерите кои што и не се така популарни во западните земји.
Американската новинска агенција укажува на тоа дека двајцата претседатели имаат тврд анти-имиграциски став. Орбан изразил надеж дека тој и Трамп, со таквиот заеднички став би можеле да формираат еден глобален сојуз.
Унгарскиот министер за надворешни работи, во неделата за државното радио откри дека се формира анти-имиграциски сојуз и дека Унгарија и Соединетите Американски Држави се меѓу малкуте земји кои во изминатите години се спротиставиле на договорот во Обединетите нации за миграција.
Заедничко кај двајцата претседатели е тоа што и двајцата изградија или најавуваат изградба на „ѕидови“ со кои се спречува „инвазијата“ на мигрантите.
Пред неколку години кога преку Балканската рута мигрантите од Блискиот исток се обидуваа да пристигнав во западноевропските земји, Унгарија се најде на удар поради поставувањето на оградата на границата со Србија и Хрватска, додека Трамп од друга страна најавува изградба на ѕид на границата со Мексико против мигрантите од Средна и Јужна Америка.
Орбан и Трамп покрај за миграциската политика, исто така разговарале за уште една „интересна“ тема која нема да ѝ се допадне пред се на Русија, а тоа е планот на Унгарија, од Американците да купи ракети од среден домет.
