Најголемата приватна јахта некогаш направена ќе биде долга 229 метри, што отприлика одговара на должината на два фудбалски терени или 24 автобуси паркирани еден до друг.
Тоа значи дека проектот “Валкири” од 680 милиони евра ќе го сруши рекордот кој го држи суперјахтата “Aзам” во сопствеништво на претседателот на Обединетите Арапски Емирати, Калифа бин Зајед ал Нахјан, која може да се пофали со должина од 180 метри.
Пловечкиот “џин” ќе има капацитет за 52 гости и 92 членови на екипажот, а една од палубите ќе биде наменета само за сопственикот. Јахтата која ќе достигнува брзина од 25 чворови ќе поседува и казино, кино, ресторани па дури и уметничка галерија, а според тврдењата на дизајнерите, таа ќе биде наменета за забавување на јавноста.
Проектот е дело на 36-годишниот јужнокорејски дизајнер Чулхун Парк, кој осум месеци во рамки на студиото соработувал со дизајнерот на јахти “Палмер Џонсон”. Бродот ќе биде направен од алуминиум и специјални структури на јаглеродни влакна.
Парк вели дека забележал дека јахтите воглавно се во бела боја и имаат облик на свадбена торта, и поради тоа одлучил да осмисли поинаков изглед на јахта.
“Пробав да го променам надворешниот изглед на структурата и да креирам облици кои не се праволиниски. Поради тоа се чини дека компонентите се поместени и искривени”, објаснува авторот на проектот.
