Откако во 2008-ма година во Финска стартуваше програмата „Најпрвин покрив над главата“, бројот на долгорочни бездомници во оваа држава се намали за 35%.
Финска во последните две децении бележи намалување на бројот на бездомници од 18 на 6 илјади, колку што биле регистрирани пред две години. Но, пред 11 години била донесена нова одлука, и ново решение. Со тоа, Финска стана единствената земја членка на Европската унија која успеа да го реши проблемот со бездомниците и тоа благодарение на еден храбар потег на државата.
Имено, во Финска кој и да нема покрив над главата, ќе го добие од државата и притоа не мора да исполнува никакви услови, а не треба да плаќа и никакви трошоци.
Сепак, сето тоа не е целосно бесплатно, затоа што корисниците на ова право добиваат статус на станари и договор за домување, па мора да плаќаат станарина за која можат да побараат државно субвенционирање. Од станот тие не може да бидат избркани и тоа станува нивен постојан дом.
„На сите им беше јасно дека стариот систем не функционира. Беше потребна радикална промена. Моравме да ги напуштиме краткорочните решенија, одлучивме да тргнеме од почеток“, изјави за „Гардијан“, Јуха Какинен, еден од водачите на сега веќе успешниот проект „Најпрвин покрив над главата“.
Така, во државата била донесена одлука на бездомниците безусловно да им се обезбеди стамбен простор. За таа цел биле изградени нови стамбени блокови, а денес се изградени домови за околу 3,500 бездомници.
„Спиењето на улиците денес е многу ретка појава“, вели градоначалничката на Хелсинки.
