Холандија во неделата пријавила над 9.300 нови случаи на коронавирусот, што е најмногу од декември минатата година. Пред само две недели дневниот просек бил околу 500.
Бројот на инфицирани од коронавирусот во Холандија се зголемил за 500 отсто минатата недела, соопштил холандскиот државен институт за здравје.
Зголемувањето на бројот на заразени го следи трендот на укинување на речиси сите рестриктивни мерки и отворањето на ноќните клубови кон крајот на месец јуни, во време кога почна да се шири делта сојот, пренесува „АП“.
Податоците од институтот покажуваат дека речиси 52.000 луѓе биле тестирани позитивно на Ковид-19 во претходните седум денови. Најголем пораст на заразени има меѓу оние на 17 и 24 години (263 отсто), потоа кај луѓето меѓу 25 и 29 години (191 отсто).
Холандија во петокот повторно ги засилила мерките за баровите, рестораните и ноќните клубови во обид да го запре порастот на инфекции меѓу младите, само две недели откако беа укинати поголем дел од ограничувањата во земјата.
Баровите сега повторно мора да бидат затворени до полноќ, додека пак дискотеките и клубовите повторно се затворени, најмалку до 13 август.
Премиерот признал дека мерките прерано биле укинати
Премиерот на Холандија, Марк Руте, признал дека мерките против коронавирусот прерано биле укинати во Холандија и изјавил дека тоа било последица на „погрешна процена“, па се извинил поради тоа. Руте и министерот за здравство Хуго де Јонге признале дека прерано го укинале ограничувањето во земјата:
„Тоа што мислевме дека ќе биде можно, се докажа дека не е можно во пракса. Лошо проценивме поради тоа се каеме и извинуваме“, изјавил Руте.
Хуго де Јонге изјавил дека делта варијантата секако дека имала забрзувачки ефект во порастот на новозаразени.
Над 46 отсто од полнолетните Холанѓани се целосно вакцинирани, а најмалку 77 отсто од нив примиле само една доза од вакцината.
Холандија заедно со останатите европски нации се бори со порастот на инфекции поради заразените од делта сојот на коронавирусот.
„Смртен удар“ за ноќните клубови
Холандската федерација за организирање настани изјавила дека е „тажна и бесна“ поради одлуките на владата повторно да воведат мерки поради коронавирусот.
„Ова се гледа како смртен удар за индустријата која единствено соработуваше со владата во пронаоѓање решенија“, се наведува во соопштението.
Холандија станува „црвена“ по порастот на бројот на новозаразени
11 региони во Холандија сега се обележани како „многу сериозни“ центри за коронавирусот, а сите освен еден од останатите 14 сега се означени како „сериозни“.
Регионот Амстердам-Амстеланд е еден од најлошо погодените, со 646 инфекции на 100.000 луѓе. Гронинген исто е „темно-црвен“ регион, како и Утрехт, Ротердам-Ријнмонд, Кенемерланд и други.
Во четвртокот центарот за контрола и превенција на болести објави мапа од Европа и Холандија за коронавирусот која покажува каква е состојбата со коронавирусот.
