Данска е најбогатата земја во Европската Унија, барем според просечното богатство на нејзините граѓани. Последните податоци на данската Централна банка покажуваат дека данските семејства имаат најголеми просечни залихи на готовина и пензиска заштеда.
Данците, мерено по глава на жител, според овие податоци имаат околу 1,3 милиони круни (170.000 евра) финансиски средства, што е повеќе од двојно од просекот на ЕУ – и тоа откако ќе се одземат долговите од имотот.
По Данска, со просечни нето финансиски средства во вредност од 211.000 американски долари, следуваат Холандија, Шведска, Луксембург, Белгија и Франција. Данска е на првото место иако истовремено го држи светскиот рекорд во негативни каматни стапки, откако централната банка за првпат ги воведе во 2012 година, пишува порталот „Блумберг“.
Од земјите од регионот, Хрватска е на другата страна на листата – помеѓу најсиромашните земји на ЕУ.
Поточно, Хрватска е петта најсиромашна земја со просечни нето финансиски средства во вредност од само 17.100 долари. Под Хрватска се наоѓаат Полска, Бугарија, Словачка и Романија, во која просечните нето средства се само 8.900 долари.
Камила Поулсен, економист во „Nykredit Wealth Management“ во Копенхаген, за „Блумберг“ вели дека првото место на Данска има многу врска со одлуките донесени пред неколку децении, за воведување на програма за пензиска заштеда што започнува веднаш по вработувањето.
Сепак, данските домаќинства, од друга страна, се исто така помеѓу најзадолжените во Европа, со кредити примарно во форма на станбени хипотеки.
Според податоците на Централната банка, долговите по глава на жител во Данска во просек изнесуваат околу 560.000 круни (55.000 евра), што е втора најголема сума на долг по Луксембург.
