Исланд, земја која успешно ја совлада епидемијата на коронавирусот и спроведе најмногу тестови по глава на жител од било која друга земја, соопшти дека планира на туристите да им предложи бесплатен тест на коронавирус за да избегнат карантин во траење од 14 дена.
Владата на Исланд соопшти дека ќе им предложи тестирање на патниците по слетувањето на аеродромот во Кеплавик најдоцна до 15 јуни, а државата ќе ги сноси трошоците за тестовите.
Од канцеларијата на владата наведуваат дека се работи на деталите за оваа понуда, а од патниците подоцна би се барале пари за да се рефундираат трошоците. Според планот, кога патникот би бил тестиран, би му било дозволено да оди дома или во хотел. Ако се воочи во текот на денот дека тестот е позитивен, таа личност би била во карантин во наредните 14 дена, пишува “AFP”.
Оние лица кои ќе приложат медицински документ кој докажува дека не се заразени со коронавирус, нема да мора повторно да бидат тестирани.
Според последните податоци, на Исланд кој брои нешто над 364.000 жители, се заразени 1.801 лице, а починале 10 лица. “AFP” наведува дека во мај се забележани 3 случаи на оваа инфекција. Исланд досега тестирал 54.791 лице, што е повеќе од 15 отсто од популацијата.
За потсетување, Исланд претходно во еден момент тестирал околу 3.000 лица, а 218 од нив биле заразени. Епидемиологот Торолфур Гуднасон тогаш изјавил дека половина од заразените немале никакви симптоми.
“Овие податоци можат да бидат корисни за научните истражувања за вирусот во иднина”, додал епидемиологот.
