Екипата на Порто направи голем подвиг, откако во Торино по продолженија одигра реми со Јувентус (2-2, регуларен дел 2-1) и патува во четвртфиналето на фудбалската Лига на шампиони.
„Бјанконерите“ важеа за голем фаворит, а иако играа со човек повеќе речиси цело второ полувреме и воедно во продолженијата, сепак, потфрлија и му доозволија на ривалот од Португалија да обезбеди место меѓу најдобрите осум во ЛШ.
На овој натпревар за Порто блескаше Серџо Оливеира. Играчот од средниот ред постигна два гола во мрежата на Шчешни и ја доби „битката“ со расположениот Федерико Киеза, кој исто така даде два гола, ама мора да се помири со елиминација од ЛШ. Порто прв поведе на мечот во 19. минута, а на стартот на вториот дел Киеза изедначи на 1-1 по асистенција на Роналдо.
Тареми направи глупост, во две минути доби два жолти картони и исклучување, а тоа го казни Киеза во 63. минута со својот втор гол, овој пат по проигрување на перфектниот Квадрадо. Иако Јувентус имаше голема иницијатива, не даде трет гол во регуларниот дел. Додуша погоди Мората во 91. минута, ама беше во офсајд.
Во екстра-времето, Порто го шокира големиот фаворит во 115. минута. Серџо Оливеира повторно блесна и го совлада Шчешни, а токму тоа беше „златниот гол“ вреден четвртфинале за тимот од Драгао. Јувентус пак ја врати предноста во 117. минута преку Рабио, ама немаше време за нешто повеќе.
