Пакистанскиот премиер Имран Кан рекол дека пакистанската разузнавачка служба ИСИ на американска ЦИА и дала траг кој и овозможил да го лоцира и убие лидерот на Ал Каеда, Осама Бин Ладен.
“ИСИ даде информации кои доведоа до пронаоѓање на Осама Бин Ладен. Ако ја прашате ЦИА, ќе видите дека ИСИ ја даде почетната локација преку телефонски податоци”, рекол Кан во интервју за Фокс.
Пакистан досега негирал дека дал било какви информации за основачот на Ал Каеда кој по повеќегодишна потера на 2-ри мај 2011-та година го убиле американските командоси во куќа во пакистански Аботабад, на стотина километри северно од Исламабад.
Сепак, пензионираниот пакистански генерал Асад Дурани, шеф на ИСИ од 1990-та до 1992-ра година, во книга издадена во 2018-та навел дека пакистанските власти веројатно му дојавиле на Вашингтон каде се крие Бин Ладен, истовремено глумејќи наивност, бидејќи соработката со САД за лице кое многумина го сметаат за пакистански херој би можела да биде понижувачка за владата.
Кан се наоѓа во посета на Вашингтон во текот на која се состанал со претседателот Доналд Трамп во обид односите меѓу двете земји да се подобрат.
