Професорот на Медицинскиот факултет, д-р Никола Пановски, во изјава за „Слободен печат“ оценува дека најновите предложени мерки од Комисијата за заразни болести се присилни, нелогични и противуставни.
За д-р Пановски особено несфатливо е што здравствените власти не го признаваат фактот дека прележувањето Ковид-19 создава природен имунитет кој е долготраен и трае и една година.
„Познавам многу луѓе со слични примери, но ќе ви кажам само еден: човек кој три пати дарува крвна плазма, прележал ковид, има силен имунитет и антитела од 32 илјади, не само што со ваквите мерки не му го признаваат имунитетот, туку и не му даваат да оди на работа?!
Значи човек чија крвна плазма ја користат за да спасат животи, го малтретираат да се вакцинира. Има граѓани кои не се антиваксери, туку се обесправени на начин што природно стекнатиот имунитет им се оспорува, иако на тестовите за антитела се покажува реалната слика.
И друга нелогичност со овие присилни мерки за присилна вакцинација е тоа што се прави поделба на граѓаните среде пандемија на вработени во јавен и во приватен сектор. Која пандемија препознава таква разлика?“, прашува Пановски, пренесува „Слободен печат“.
Тој додава дека предложените мерки се неуставни и незаконски.
За потсетување, вчера Комисијата за заразни болести донесе предлог вработените во јавна и државна администрација да не можат да влезат на работното место без да покажат сертификат за вакцинација, ПЦР тест не постар од 72 часа или сертификат за прележаност на ковид-19, не постар од 45 дена.
Комисијата препорача и вакцината да биде задолжителна за сите здравствени работници.
Мерката ќе стапи на сила 10 дена откако ќе биде изгласана од владата.
