Осудените возачи кои што управувале со своето возило во алкохолизирана состојба, ќе помагаат во лекувањето на пациентите повредени во сообраќајни несреќи, а кога ќе нема такви пациенти, ќе работат во мртовечница.
Додека македонските власти планираат да ги намалат казните за сообраќајни прекршоци и со тоа веројатно да поттикнат уште поголемо безредие на улиците и патиштата ширум земјава, Молдавија има едно поинакво решение.
Оваа држава воведе програма за справување на проблемот со возењето во алкохолизирана состојба, а таа веќе стапи на сила.
Доколку сакаат да ја добијат назад својата возачка дозвола, возачите кои се осудеи на возење во алкохолизирана состојба ќе мора да работат во мртовечница. Возачите можат да платат околу 230 долари (околу 12,500 денари) за влегување во таа програма и да станат волонтери за работа со лешови во мртовечниците во државата.
Иако ова можеби изгледа како евтин начин за враќање на возачката дозвола, сепак треба да се напомене дека просечната плата во Молдавија изнесува околу 340 долари, или околу 18,500 денари, а програмата трае три месеци.
Според програмата, осудените пијани возачи помагаат во болничкото лекување на пациентите кои настрадале во сообраќајни несреќи, а кога нема такви пациенти, волонтираат во мртовечница.
Првиот дел од програмата започнал во мај оваа година – шест лица осудени за возење во алкохолизирана состојба веќе работеле со пациенти и во мртовечница. Нивните должности биле перење на лешовите пред обдукција, нивно складирање во ладилниците и слично.
„Работата во мртовечницата ме поттикна да не пијам алкохол, ниту капка во животот, јас не сакам повеќе да бидам таму. Тоа што го гледате во мртовечницата останува како поука“, изјавил еден неименуван учесник во програмата.
Молдавците велат дека на овој начин неодговорните возачи подобро ќе ја сфатат сериозноста на последиците и повеќе ќе го ценат животот на останатите учесници во сообраќајот.
