Скоти Пипен одново ја „отвори душата“ и го нападна својот поранешен соиграч од редовите на Чикаго Булс, Мајкл Џордан. За време на пандемијата, легендарниот кошаркар го објави својот документарен филм „Последниот танц“. Многу негови поранешни соиграчи се почувствуваа омаловажени во сите десет епизоди.
Тоа најмногу го погоди Пипен, кој беше „втора виолина“ за време на доминацијата во 90-те години во НБА лигата.
„Тој ја покажа својата приказна. Секоја епизода беше иста. Џордан во преден план, а неговите соиграчи на второ место, што беше случајот и во текот на цела негова кариера. Мајкл можеше да шутира 6/24, да има пет загубени топки, а јавноста и натаму прикажиуваше дека тој е безгрешен.
Разговарав со голем број соиграчи кои се чувствуваа омаловажено како мене со овој документарец. Како Мајкл се осмели да се однесува така со нас после сè што направивме за него и неговиот скапоцен бренд? За да бидат работите уште полоши, Мајкл доби десет милиони долари за филмот, а јас и моите соиграчи не добивме ништо“, изјави Пипен.
Пипен исто така рече дека Џордан го направил филмот за помладата генерација да не заборави што направи и да не го става Леброн Џејмс на врвот, кога е во прашање листата најдобри кошаркари на сите времиња.
