Откако ракометната сезона на Вардар заврши со прекинувањето на пролетта во Лигата на шампионите, клубот веќе започна да ја подготвува сезоната 202021. Со Михајло Михајловски како човек кој се вклучува да го раководи двојниот европски шампион веќе почнаа и првите назнаки како ќе изгледа ростерот за сезоната која започнува наесен.
По серијата на заминувања и разделбата со Гедбан, Кристопанс, Кугис, Скубе, Кукуловски, Шишкарев клубот ги прави првите сигнали на консолидација. Големи се шансите дека тренерот Стевче Алушовски за следната сезона ќе може да смета на Ристовски, Мишевски, Дибиров, Стоилов, Чупиќ, Калараш, а сега се наѕира и првото засилување. Вардар и ППД Загреб се наоѓаат пред договор за позајмица на Ненад Костески за следната сезона, дознава Gol.mk.
Младиот стружанец, член на младинската репрезентација и потенцијален сениорски репрезентативец, ќе се врати во македонскиот ракомет и ќе го засили Вардар. Стружанецот потпиша за хрватскиот првак, па беше позајмен во Горица. Одличниот однос на Вујовиќ со својот поранешен клуб, Михајло Михајловски и Стевче Алушовски играат главна улога при договорот. За неговите услуги заинтересиран беше и Еурофарм Пелистер, но вардарци беа побрзи во преговорите.
Вардар преговара со уште неколку ракометари и со буџетот, со кој се шпекулира дека ќе располага, пак се очекува да создаде компетивен тим.
