Индонезискиот претседател Јоко Видодо им наложи на сите расположливи сили да учествуваат во потрагата по исчезнатата подморница.
Недалеку од Бали трае очајничка трка со времето – бродови на индонезиската морнарица и неколку други земји се обидуваат да дојдат до подморницата со 53 членови на екипажот кои доколку се живи, имаат кислород за уште 24 часа.
Во потрагата по подморницата се вклучи и американската морнарица, а индиската морнарица соопшти дека на длабочина од 50 до 100 метри пронашла неидентификуван објект. Меѓутоа, додека не пристигнат бродови кои може да го прегледаат теренот под површината на водата, не може точно да се знае за што станува збор.
„КРИ Нагала 402“ исчезна откако побара дозвола за нурнување во длабоките води за време на воена вежба. Се стравува дека подморницата е премногу длабоко за да може да се дојде до неа. Се проценува дека доколку морнарите се живи, тие ќе имаат кислород до 3 часот наутро во сабота по локално време.
„Денеска ќе ги зголемиме своите напори до утре во 3 часот наутро“, изјави портпаролот на индонезиската војска, генерал мајор Ахмад Риад.
Спасувачките екипи се фокусираат на подрачје во кое на површината е пронајдена нафтена дамка после исчезнувањето на подморницата. Иако нема докази дека нафтената дамка потекнува од исчезнатата подморница, индонезиските власти сметаат дека поради високиот притисок би можело да биде оштетено телото на подморницата и поради тоа да биде излеана нафта. Исто така, постои можност екипажот намерно да има испуштено нафта со цел подморницата полесно да исплива на површината.
Се верува дека подморницата има потонато на длабочина од 600 до 700 метри, што е значително подлабоко од максималната длабочина на која трупот на пловилото може да го издржи притисокот на водата (околу 200 метри), па постои можност подморницата да е згмечена и уништена од високиот притисок на водата.
Причината за исчезнувањето засега не е позната. Подморницата била произведена во 70-тите години од минатиот век, а била модернизирана во Јужна Кореја во 2012-та година.
