Михаил Подољак е еден од украинските преговарачи и човек од голема доверба на претседателот Володимир Зеленски. Подољак неколку пати седнувал на преговарачката маса, а деталите ги открил во интервју за “The Telegraph”.

Се јавил од бункер

„Нема да има придвижување во мировните преговори со Русија се додека тие не престанат да пукаат на цивили кои се обидуваат да побегнат преку хуманитарните коридори од обиколените градови“, веднаш на почетокот на разговорот предупредил главниот украински преговарач.

Интервјуто го дал од бункер во добро утврдената претседателска канцеларија во Киев.

„На Украина и се потребни јасни гаранции за безбедноста. Но, засега гледаме дека руската страна не исполнува ни елементарни договори за хуманитарните коридори за излегување на цивили од обиколените градови. Цивилите едноставно се уништуваат со руско оружје“, рекол тој.

Повторно апелирал на НАТО да воведе зона за забрана на летови над Украина. Подољак не верува дека Русија сака светска војна.

„Верувате ли дека Русија навистина е подготвена да се соочи со НАТО. Погледнете што им се случува во Украина. НАТО е неколку пати посилен од нашите вооружени сили. А сепак, Украина веќе втора недела успешно се брани од една од најголемите светски војски. Мислите дека Русија има потенцијал за Трета светска војна? Престанете со таа самохипноза“.

„Русите не го исполнуваат ветеното“

„Русија поставува нереални барања. Секако дека сакаме мир. Но тоа не значи дека ќе прифатиме демонтажа на нашата слобода и демократија, нашите природни европски амбиции. Ако руската страна заземе став базиран на реалност, а не на нереални амбиции, тогаш напредок е можен“, рекол тој.

„Досега видовме дека руската страна не го исполнува ветеното. Нивите трупи пукаат во луѓе кои се обидуваат да ги напуштат окупираните градови. Гранатираат рути по кои може да се организира излегување на луѓе, посебно во Маријупољ и Волноваки. Поради тоа можам да кажам дека руската страна манипулира, повеќе отколку што вложува во преговорите“, вели Подољак.

Водечкиот руски преговарач Владимир Медински тврди дека гледа придвижувања во преговорите, но Подољак не го споделува неговото мислење.

„Преговорите не се спој и барање на нешто заедничко. Контактот е лажна цел во процесот на преговорите, мора да бидете ориентирани на резултатите. А резултатите допрва треба да се видат. Во неделата во Ирпин руските трупи отвориле оган на цивили кои се обидоа да побегнат од градот. Загинаа осум лица, вклучувајќи семејство со две деца. Убиени од минофрлачки оган“, рекол тој па продолжил:

„Во Киев руска крстаречка ракета е соборена над најважната детска болница во Украина. Да, гледаме дека преговорите продолжуват на различни нивоа, но исто така гледаме дека таа луда инвазија не престанува, убиствата не престануваат…“

Киријев не е убиен при апсење

Претседателот Зеленски многу пати нудел состанок и директни преговори со Владимир Путин, но од тоа нема ништо. За четврток е договорен нов состанок меѓу украинска и руска делегација. Ќе се одржи во Анталија.

За смртта на украинскиот преговарач Денис Киријев, за кој Русите тврдат дека бил убиен при апсење поради предавство, вели дека тоа е дезинформација.

„Тој човек загина додека вршеше задача во интерес на украинската држава“, уверува Подољак.

За крај, пратил порака до украинскиот народ, но и до светот.

„Повеќето наши градови кои Русија планираше да ги заземе храбро се борат. Во градовите кои се привремено окупирани се одржуваат масовни протести против окупаторот. Ова е вистинско граѓанско херојство, невооружени луѓе со национални знамиња против вооружени окупатори, бараат Русите да ја напуштат нашата земја“, рекол Подољак па подвлекол:

„Украина нема да се откаже од својата слобода и од својата демократија. Ако Русија во Украина ја скрши слободата и демократијата, верувајте дека истите ќе бидат скршени и во цела источна Европа. Свесни сме за својата одговорност. И ние ќе се бориме против окупацијата. Само сакам западните земји да престанат да се плашат да се борат со нас. Во најмала рака, пружете ни ја помошта која ја бараме“.