Кој ќе седне во жешката фотелја на директорот на Бирото за јавна безбедност, Лазе Велковски, најверојатно, ќе се знае уште утре кога на владина седница би требало да се расправа за негово разрешување, што доаѓа по скандалот со злоупотребата на неговиот службениот автомобил за превезување на неговата ќерка во Грција.
Иако се уште нема официјални информации дали заедно со предлогот за разрешување ќе биде поднесен и предлог за именување на нов директор, сепак во јавноста се шпекулира дека најголеми шанси за прв човек на БЈБ да биде именуван има пензионираниот полициски генерал Зоран Јовановски-Челик. Извори од МВР велат дека Јовановски е избор на министерот Оливер Спасовски, поради тоа што важи за голем професионалец и целиот работен век го поминал во безбедносните служби, а бил и во специјалните единици. Во неговата професионална кариера извршувал голем број на раководни задачи, беше прв човек на униформираниот дел на полицијата, а пред да се пензионира во 2017 година бил началник на Единицата за известување и командување. Јовановски учествувал во воениот конфликт во 2001 година и бил ранет во Ваксинце. Јовановски ужива голем углед во полициските кругови.
И актуелниот директор Велковски е професионалец кој целиот работен век го поминал во полиција и успешно извршувал раководни случаи, но директорската позиција му се залула поради скандалот со користење на полицискиот џип, за кој се правдал дека го направил поради заканите по живот кој ги добивал за својата ќерка.
Во својот исказ пред внатрешната контрола, директорот Велковски потенцирал дека ангажирањето на службеното возило го направил од крајна нужност, поради тоа што подолго време постоеле закани кон него и неговото семејство, а од причина што истиот ден тој бил работно ангажиран во врска со прославата на 2 Август и заради нарушувањата на јавниот ред и мир во текот на прославата на Мечкин Камен, како и настани кои претходеле, проценил дека е небезбедно неговата ќерка да патува сама.
Скандалот кој беше обелоденет на социјалните мрежи предизвика бура од реакции во јавноста.
