Поради еден случај на Covid-19 во Франција – од декември – се поставуваат сосема нови прашања поврзани со почетокот на пандемијата и ширењето на коронавирусот. Имено, Covid-19 е откриен во еден “стар” примерок на лице заболено од воспаление на белите дробови. СЗО сега бара и другите земји да прегледаат примероци на случаи со воспаление на белите дробови кон крајот на 2019-та година.
Бидејќи, може да се каже дека пациентите водени како заболени од воспаление на бели дробови – всушност биле почетни случаи на Covid-19, изјавил портпаролот на СЗО, Кристијан Линдмајер за ARD.
Првиот случај во Франција бил регистриран на 24-ти јануари
Ако се откријат уште такви случаи, тоа би му помогнало на светот до добие “нова и појасна слика” за епидемијата. Кинеските власти на 31-ви декември прв пат го известиле СЗО за новата болест на белите дробови. Досега се претпоставувало дека заразата во Европа се проширила дури од јануари.
Првите позитивни тестови на корона во Франција биле на 24-ти јануари. Меѓутоа, истражувањето на француските научници објавено во понеделникот вели дека можеби уште кон крајот на минатата година имало први случаи.
Портпаролот на СЗО: Сосема нова слика
Една болница во Франција повторно тестирала стари примероци на пациенти со воспаление на бели дробови. Било откриено дека на 27-ми декември бил лечен маж со Covid-19
Портпаролот на СЗО, Линдмајер рекол дека резултатите од истражувањето не се изненадување. Сепак, со откривањето на случајот од декември се создава сосема нова слика, вели Линдмајер. Наодите би можеле да помогнат подобро да се разбере потенцијалната циркулација на Covid-19.
