Претседателот на Русија, Владимир Путин, два дена во пресрет на терористичките напади на 11-ти септември 2001-ва година во Њујорк и Вашингтон, му се јавил на американскиот колега Џорџ Буш.
Путин му открил на Џорџ Буш дека Русија има разузнавачки податоци за можна организација на терористички напади, тврди поранешниот аналитичар во ЦИА, Џорџ Биби во својата книга.
Книгата насловена „Руска замка: Како нашата војна од сенка со Русија може да прерасне во нуклеарна катастрофа“ беше објавена оваа седмица во Соединетите Американски Држави.
Џорџ Биби претходно беше на чело на аналитичкото одделение при ЦИА кое што се занимавало со Русија, а сега работи како потпретседател на Центарот за национални интереси во Вашингтон.
„Путин му се јави на претседателот Буш два дена пред терористичките напади, за да му каже дека руската разузнавачка служба наишла на сигнали дека се подготвува терористичка акција, дека таа доаѓа од Авганистан и дека е во прашање нешто што се планира одамна“, пишува Биби во својата книга.
Тој потсетува дека Путин бил првиот странски лидер кој му се јавил телефонски на Буш на 11-ти септември после терористичките напади, со цел да изрази поддршка.
Инаку, во архивот на вести на официјалната интернет страница на Кремљ постои веста за телефонскиот повик објавена на 10-ти септември 2001-ва година. Но, соопштено е дека разговорот бил одржан на иницијатива на Американците и дека станувало збор за подготовки за самитот на Азиско-пацифичката економска соработка и руско-американскиот самит.
Наведено е дека Путин и Буш изјавиле дека се задоволни од интензитетот на контактите во воено политичката сфера, економијата и другите области.
