Данска на исклучително доминантен начин ја освои титулата на Светското првенство, а МВП на шампионатот беше Микел Хансен.
Ракометарот на ПСЖ играше неверојатно, ги згази сите, од прв до последен и заврши со 72 гола или во просек од 7,2 по натпревар. На многумина им беше чудно ова негово издание, но ден по Мундијалот излегоа дел од причините за неговата игра.
За разлика од другите дански ракометари, на Хансен му било дозволено да престојува и преспива во својот дом, во родниот Хелсингор покрај своето семејство.
„По секој натпревар можев да заминам дома. Селекторот Николај Јакобсен беше многу фин и ми даде слобода да бидам покрај новородениот син Еди Макс. Ме опушти фактот дека можев да бидам со блиските тие неколку денови, тоа ја извлече најдобрата верзија од мене“, објасни Хансен.
