Репрезентацијата на Македонија за првпат во својата историја си обезбеди бараж за Светското првенство во фудбал, кое следната година ќе се одржи во Катар. „Рисовите“ со победата над Исланд го „чекираа“ второто место и во подредена улога ќе го дочекаат баражот.
Таму, избраниците на Благоја Милевски ги очекува пекол, а ништо помалку не требаше ниту да се очекува во оваа фаза од натпреварувањето. Веќе се познати четири од шесте можни ривали на Македонија во полуфиналниот бараж. Во ждрепката наспроти Македонија со сигурност ќе застанат последните два европски прваци Португалија и Италија, како и Русија и Шкотска.
Покрај нив, за последните две места завршната битка ќе се води утре. Во одлична позиција да ја задржи повластената улога во извлекувањето е Шведска, која има 15 бода на табелата за второпласирани. Зад неа како шеста на мини-табелата се наоѓа Полска, ама Турција е најголема закана за нив.
За одземање на местата на Шведска и Полска ќе се борат Велс или Чешка (Велшаните играат со Белгија, Чешка со Естонија), а нејасна е разврската и во групата Г. Таму Турција е второпласирана, пред утрешниот дуел со Црна Гора. Со победа може да ги надмине Полјаците и да добие повластена улога. На изненадување се надева Норвешка која гостува кај Холандија и со евентуална победа ќе ги испрати во баражот или целосно надвор од игра за Мундијалот.
По крајот на утрешните натпревари сè ќе биде појасно, а засега постојат многу математики за последните две повластени позиции во ждрепката која ќе се одржи на 26 ноември.
