Рускиот претседател Владимир Путин во обраќањето во Федералното собрание рекол дека Русија е подготвена да се брани ако Вашингтон одлучи да размести проектили во Европа.

Тој рекол дека САД во тој случај ќе бидат мета на руски ракети. 

Путин изјавил дека Русија нема прва да размести ракети во Европа, но дека, ако САД го направи тоа, Москва ќе го сфати како закана.

“Во тој случај Москва ќе биде принудена да размести оружје за да може да гаѓа не само територија каде се разместени ракетните системи, туку и териториите каде се наоѓаат центрите за носење на такви одлуки”, рекол Путин во обраќањето.

Коментирајќи го повлекувањето на САД од Договорот за ракети со среден и мал дострел – INF, Путин рекол дека од моментот на потпишувањето на тој документ до денес, многу земји работеле на развој на такво оружје, додека Вашингтон и Русија не.

Според неговите зборови, Америка требало така и да каже, а не да измислува причини за да излезе од INF.

Путин нагласил дека САД го прекршиле тој договор за разместување на системот “Еџис Ашор” во Европа, кој е во состојба да лансира “томахавки”.

Путин го претставил новото вооружувење – “Циркон”

Владмир Путин денес претставил и нови типови на вооружување, а најголемо внимание и дал на хиперсоничната ракета “Циркон”, која е во состојба да лета со брзина од девет маха.

Путин во текот на обраќањето во Федералното собрание рекол дека започнало и сериско производство на комплексот “Авангард”, како и производството на “Сармат”.

Најновите оружја “Пересвет” и “Кинџал” ја покажале својата ефикасност, а успешно тестирање минал и “Буревесњик”, додека “Посејдон” ќе биде спуштен во вода во првиот квартал од оваа година.

“Русија е суверена држава”

Русија била и ќе биде суверена независна држава – или ќе биде таква или воопшто нема да постои, порачал рускиот претседател.

“Русија била и ќе биде суверена земја, таа ќе биде таква или воопшто нема да постои. Русија не може да биде држава ако не е суверена. Некои земји можат, но Русија не може”, истакнал рускиот претседател.

Ширењето на доверба и соработка со другите земји во разни сфери е приоритет во надворешната политика, додал Путин.

Тој зборувал и за спорот со Јапонија, велејќи дека е од голема важност да се пронајде пат за да се потпише мировен договор.

Резервите на Русија целосно го покриваат надворешниот долг

Златните и девизните резерви на Русија во целост го покриваат целосниот надворешен долг на земјата, прв пат во историјата, порачал рускиот претседател.

Тој издвоил четири економски приоритети на земјата – раст на продуктивноста на работата, зголемување на извозот на секундарна роба, подобрување на бизнис климата, како и отстранување на сите економски ограничувања. Путин, исто така, и наложил на владата да креира и најповолни услови за инвестиции во високо-технолошките старт-ап компании.

“Целосното наше законодавство мора да биде во склад со актуелната технолошка ситуација”, порачал шефот на руската држава.

Исто така и дал налог на Централната банка што побрзо да го нормализира микрофинансискиот пазар и укажал на потребата за заштита на граѓаните од “измамите на бескрупулозните кредитори”.