Претседателот на Аргентина е позитивен на коронавирус, иако на почетокот на оваа година тој ја прими вакцината против вирусот.
Алберто Фернандез ја прими руската вакцина јавно во болница во Буенос Аирес на 21-ви јануари оваа година, но во петокот добил покачена температура и блага главоболка, по што се тестирал.
Фернандез направил брз антигенски тест, па потоа и ПЦР тест во текот на викендот, по што било потврдено дека е позитивен на коронавирусот.
„Веќе сум изолиран, ги почитувам важечките протоколи и ги следам упатствата на мојот личен доктор. Ги контактирав луѓето со кои се сретнав во последните 48 часа“, изјави аргентинскиот претседател.
Од медицинскиот тим на претседателот ја информираа јавноста дека Фернандез е „стабилен, асимптоматски, со параметри на границата на нормалата“.
Како реакција на веста, рускиот Институт „Гамалеја“, каде што беше развиена вакцината „Спутник 5“, ја повтори високата ефикасност на вакцината, повикувајќи се на податоци од истражувањата објавени во медицинскиот магазин „Лансет“ во февруари.
„Тажни сме што го слушаме ова. Вакцината е 91,6% ефикасна против инфекција и 100% ефикасна против тешките случаеви. Ако инфекцијата е навистина потврдена и се има случено, вакцинацијата обезбедува брзо опоравување без сериозни симптоми. Ви посакуваме брзо опоравување“, порачаа од „Гамалеја“.
Да потсетиме, Аргентина беше првата јужноамериканска земја која ја одобри руската вакцина во декември минатата година и нарача 25 милиони дози.
