Четворица поранешни министри и заменици за земјоделство утрово се приведени во истрага поврзана со злоупотреби на земјоделска помош и издавање државно земјоделско земјиште.

Од кривичниот суд за „Макфакс“ потврдија дека во моментов три лица се донесени на распит кај судија на претходна постапка.

Неофицијално, во акцијата на одделот за организиран криминал на МВР се приведени поранешните министри Ацо Спасеновски и Михаил Цветков, како и ексзаменик-министерот Кристијан Делев. Четвртоосомничен е актуелниот пратеник Љупчо Димовски, кого го бара полицијата.

Осомничените министри за земјоделство го оштетиле буџетот од над 1,4 милиони евра

Основното јавно обвинителство за гонење на организиран криминал и корупција отвори истрага против четири лица за кои постои основано сомнение дека сториле кривично дело – Злоупотреба на службена положба и овластување при јавни набавки.

„Лицата се осомничени дека во својство на министри за земјоделство, шумарство и водостопанство и нивни заменици во одреден период склучувале договори за закуп на земјоделско земјиште, кои не ги раскинувале иако закупувачите не го плаќале надоместокот за закуп. Станува збор за досега утврдени 584 договори за закуп на земјоделско земјиште на разни локации низ државата. На овој начин била предизвикана штета на Буџетот на Република Македонија во износ од 88.467.607 денари (над 1,4 милиони евра)“, соопштија од Обвинитеслтвото за гонење организиран криминал и корупција.