Ексдиректорот на тајната полиција, Сашо Мијалков, во 12.30 часот треба да ја чуе првата пресуда за предмет на СЈО, во случајот „Титаник 2“.
Ова ќе биде прва пресуда од четирите активни обвиненија за Мијалков. Тој е обвинет во случаите: „Таргет-Тврдина“, „Тортура“, „Трезор“, а осомничен е во истрагата за „Империја“. Ако судот донесе осудителна пресуда, казната затвор за Мијалков предвидена во Кривичниот законик е од една до пет години.
Во „Титаник 2“, за кривичното дело злоупотреба на службената положба и овластувањето, обвинети се лидерот на ДПА, Мендух Тачи, и поранешните членови на ДИК: Бедредин Ибраими, Анета Стефановска, Влатко Сајковски и Сашо Срцев. Ексдиректорот на УБК, Сашо Мијалков, е обвинет за кривичното дело примање награда за противзаконито влијание.
Според обвинението на СЈО, Мијалков и Тачи се испазариле и успеале незаконски да биде поништено гласањето на локалните избори во Струмица во 2013 година. Во предметот беа обвинети и 5 управни судии, но Апелациониот суд ги спаси од кривичен прогон.
Првото рочиште за овој предмет се одржа на 24 април 2018 година.
